بۇگىندە نىساننىڭ قۇرىلىسى اياقتالعان. ەندى شولاققورعان اۋىلىنداعى «اقشام» جانە «ناۋرىز» شاعىناۋداندارىنداعى 5600 تۇرعىن، 1111 ابونەنت تازا اۋىز سۋعا قول جەتكىزبەك. جاڭا نىساندى كورگەن ءوڭىر باسشىسى اۋىلدار مەن ەلدى مەكەندەردى تولىق اۋىز سۋمەن قامتۋ باعىتىندا جۇمىستار كەزەڭ-كەزەڭىمەن جۇرگىزىلىپ جاتقانىنان توقتالدى.
– وزدەرىڭىز بىلەسىزدەر، ەلىمىزدە اۋىز سۋ ماسەلەسى وزەكتى. وبلىس تۇرعىندارىنىڭ 90 پايىزعا جۋىعى اۋىلداردا تۇرادى. اۋىلدار مەن شاعىن ەلدى مەكەندەردە اۋىز سۋ ماسەلەلەرى كەزەڭ-كەزەڭىمەن شەشىمىن تابۋدا.
سوزاق اۋدانىنا جاساعان العاشقى ساپارىمدا وسى شولاققورعان اۋىلىنىڭ «اقشام» جانە «ناۋرىز» شاعىن اۋداندارىنىڭ تۇرعىندارى اۋىز سۋ ماسەلەسىن كوتەرگەن. بۇل بويىنشا ءتيىستى شارالار اتقارىلدى. تۇرعىنداردى ورتالىقتاندىرىلعان ساپالى اۋىز سۋمەن تۇراقتى قامتۋ ءۇشىن قۇرىلىس جۇمىستارىن وتكەن جىلى باستادىق.
بۇل جۇمىستار اياقتالىپ، جاقىن كۇندە شولاققورعان اۋىلى تۇرعىندارى 24 ساعات ساپالى اۋىز سۋمەن قامتىلادى. بۇعان قوسا وتكەن جىلى قارابۇلاق، بالدىسۋ، باسبۇلاق، سارجاز جانە سىزعان ەلدى مەكەندەرىن ورتالىقتاندىرىلعان اۋىز سۋمەن قامتۋ جۇمىستارى باستالدى. تۇرعىندار تاراپىنان كوتەرىلگەن ءاربىر ماسەلە ءبىز ءۇشىن وتە ماڭىزدى، – دەدى دارحان ساتىبالدى.
نىساننىڭ قۇرىلىس جۇمىستارىن «QAZ STROY EVEREST» ج ش س جۇرگىزدى. جوبا قۇنى – 1 547 373،0 مىڭ تەڭگە. قۇبىردىڭ جالپى ۇزىندىعى – 93،917 شاقىرىم. قۇرىلىسى 2022 جىلدىڭ قاراشا ايىندا باستالعان نىسان، 2023 جىلدىڭ سوڭىندا اياقتالدى. قازىرگى تاڭدا جەكە تۇرعىن ۇيلەردى اۋىز سۋعا قوسۋ جۇمىستارى جۇرگىزىلۋدە.
دارحان ساتىبالدى شولاققورعان اۋىلىندا ورنالاسقان ى.التىنسارين اتىنداعى جالپى ورتا مەكتەبىنىڭ قۇرىلىس الاڭىندا بولىپ، جۇرگىزىلىپ جاتقان جۇمىستاردى باقىلادى. جاۋاپتى باسشىلارعا جۇكتەلىپ وتىرعان مىندەتتەردى جاۋاپكەرشىلىكپەن اتقارۋدى تاپسىردى.
– مەملەكەت باسشىسى قاسىم-جومارت كەمەل ۇلى ءبىلىم سالاسىنىڭ جاندانۋىنا ەرەكشە كوڭىل ءبولىپ كەلەدى. وتكەن جىلى پرەزيدەنتىمىزدىڭ باستاماسىمەن قولعا الىنعان «جايلى مەكتەپ» ۇلتتىق جوباسى اياسىندا وسىندا ى.التىنسارين اتىنداعى 900 ورىندىق جالپى ورتا مەكتەبىنىڭ قۇرىلىسىن باستادىق. جاڭا مەكتەپتىڭ تەحنيكالىق جاراقتاندىرۋ ۇلەسى 4 ەسەگە ۇلعايتىلىپ، وقۋ كابينەتتەرى ينتەراكتيۆتى تاقتالارمەن جانە كومپيۋتەرلەرمەن جابدىقتالادى. جاۋاپتى تۇلعالاردان قۇرىلىس ساپاسىنا اسا كوڭىل ءبولۋدى تالاپ ەتەمىز، – دەدى وبلىس باسشىسى.
«سامۇرىق-قازىنا» اكسيونەرلىك قوعامىنىڭ قارجىلاندىرۋىمەن سالىنىپ جاتقان ءبىلىم ورداسىنىڭ قۇرىلىسىن بيىل اياقتاۋ جوسپارلانۋدا. وقۋ ورداسىنىڭ جوبا قۇنى – 5950،000 ملن. تەڭگە. قۇرىلىس جۇمىستارىن «قاراتاۋ لتد» ج ش س جۇرگىزىپ جاتىر. ءبىلىم ۇياسى 900 ورىنعا لايىقتالعان.
