Jelide Jetisý oblysynyń Sarybel aýmaǵynan Dýlat babanyń beiiti tabylyp, basyna belgitas qoiylǵany týraly aqparat tarady. Alaida tarihshy Batyrjan Seidomar bul máselege saqtyqpen qaraý keregin aitady, dep habarlaidy dalanews.kz.
Onyń sózinshe, eń aldymen “Dýlat baba” uǵymynyń ózin tarihi turǵydan naqtylap alý qajet.
“Dýlat, Naiman, Jalaiyr, Qańly siiaqty ataýlardy biz búgin kóbine bir adamnyń esimi retinde qabyldaimyz. Alaida tarihi derekterde olar taipalyq birlestikterdiń ataýy retinde kezdesedi. Shákárim de, Shoqan Ýálihanov ta Dýlatty naqty ómir súrgen adam retinde kórsetpeidi”, - deidi tarihshy.
Sarapshy osyǵan bailanysty Jetisý oblysynan tabylǵan qorymdy nemese Jambyl oblysyndaǵy keseneni naqty Dýlat babanyń jerlengen orny dep kesip aitýǵa ǵylymi negiz jetkiliksiz ekenin jetkizdi.
“Jambyl oblysyndaǵy kesene de, Sarybeldegi qorym da naqty Dýlat babaniki dep dáleldengen joq. Mundai tujyrym jasaý úshin arheologiialyq jáne antropologiialyq zertteýler qajet”, - dedi ol.
Tarihshynyń aitýynsha, bul másele boiynsha shejirelik derekter ǵana jetkiliksiz.
“Folklor men shejire belgili bir baǵyt beredi. Biraq ǵylymi qorytyndy jasaý úshin arheologiia, jazba derekter jáne basqa da zertteý ádisteri qatar qoldanylýy kerek”, - deidi Batyrjan Seidomar.
Sondyqtan maman Sarybel aýmaǵyndaǵy qorymdardy zertteý úshin arnaiy arheologiialyq jumystar júrgizip, jerlengen adamdardyń ómir súrgen kezeńin anyqtaý qajet ekenin atap ótti.
Aita keteiik, buǵan deiin áleýmettik jelilerde Jetisý oblysynyń Saryózek óńirindegi Sarybel aýmaǵynan Dýlat babanyń beiiti tabylǵany týraly video taraǵan edi.
Video avtorlarynyń aitýynsha, belgitas Saryózek pen Kóksý aýdandarynyń shekarasyna jaqyn aýmaqta ornatylǵan. Olar óz tujyrymdaryn keńestik kezeńge deiingi kartalardaǵy belgilermen bailanystyrady.
Sondai-aq beinejazba avtorlary Keńes Odaǵy kezinde áskeri maqsattaǵy nysandar men raketalyq shahtalar salynǵan kezde óńirdegi kóptegen kóne qorymdardyń búlingenin alǵa tartqan. Olardyń sózinshe, Sarybel aýmaǵynda buryn birneshe tarihi qorym ornalasqan.
Videoda bastamashyl top ókilderi bul orynnyń Dýlat babanyń jerlengen jeri bolýy múmkin ekenin aityp, beiit basyna arnaiy belgitas ornatqanyn málimdedi. Sonymen qatar atalǵan aýmaqty bolashaqta ǵylymi turǵydan zerttep, tarihi mura retinde tirkeý qajet ekenin jetkizgen.
Alaida ázirge bul málimetter ǵylymi qaýymdastyq nemese quzyrly organdar tarapynan resmi túrde rastalǵan joq. Sondyqtan Sarybeldegi qorymnyń naqty kimge tiesili ekeni jáne onyń tarihi mártebesi arnaiy zertteýlerden keiin ǵana belgili bolýy múmkin.
