Jetisý oblysy Sarqan aýdanynda alǵashqy Belsendi uzaq ómir súrý ortalyǵy ashyldy. Oblys ákimi Beibit Isabaev jumys sapary aiasynda atalǵan jańa nysannyń jumysymen tanysty,- dep habarlaidy Dalanews.kz
Sarqan qalasyndaǵy Belsendi uzaq ómir súrý ortalyǵy «Januia» otbasyn qoldaý ortalyǵymen qatar ornalasqan. Onda zeinet jasyndaǵy turǵyndardy áleýmettendirý, fizikalyq jáne psihikalyq densaýlyqtaryn nyǵaitý úshin olardy belsendi mádeni, shyǵarmashylyq, sporttyq sharalarǵa tartýǵa barlyq jaǵdai jasalǵan. Yńǵaily bolý úshin eki ortalyqqa bir kólik berilgen.
Belsendi uzaq ómir súrý ortalyǵyna kelgen ardagerlermen áńgimelesken Beibit Isabaev biyl Alakól, Kóksý aýdandarynda osyndai eki nysan ashylatynyn aitty.
- Bizdiń mindetimiz – aǵa býynǵa qamqorlyq jasaý. Biz sizderge eseli eńbek etip, óńirdiń áleýmettik-ekonomikalyq damýyna úles qosqandaryńyz úshin alǵys aitamyz. Sonymen qatar jastardyń laiyqty azamat bolyp ósýi úshin urpaq tárbiesine, qoǵamdyq ómirge belsene qatysqandaryńyz mańyzdy. Osyǵan bailanysty bizge sizderdiń bilimderińiz, ómirlik tájiribelerińiz ben qoldaýyńyz qajet, - dedi oblys ákimi.
Odan soń óńir basshysy Sarqan qalasynda 2023 jyly ashylǵan «Januia» otbasyn qoldaý ortalyǵynyń qyzmetimen tanysty. Atap ótsek, ortalyqta 19 qyzmetker jumys isteidi. Munda ómirlik qiyn jaǵdaiǵa tap bolǵan jáne turmystyq zorlyq-zombylyqqa ushyraǵan adamdarǵa áleýmettik, quqyqtyq, psihologiialyq kómek kórsetiledi. Ortalyqqa júgingenderge bir aiǵa deiingi merzimge ýaqytsha turýǵa múmkindik jasalǵan. 2024 jyly ortalyqqa 106 ótinish kelip tússe, al osy jyldyń basynan 24 ótinish túsken. Osy oraida aldyn alý sharalary aiasynda óńirdiń árbir aýdany men qalasyndaǵy ortalyqtarmen birlesip, quramynda aýdan-qalalar ákimderiniń orynbasarlary, áleýmettik qyzmetkerler, bilim berý, densaýlyq saqtaý jáne quqyq qorǵaý organdarynyń ókilderi bar arnaiy mobildik toptar jumys júrgizýde.
Jetisý oblysynda 7 «Januia» otbasyn qoldaý ortalyǵy jumys isteidi, al biyl osyndai ortalyqtar Aqsý, Eskeldi jáne Kóksý aýdandarynda iske qosylmaq. Ortalyqtardy qurý men ashý «AMANAT» partiiasynyń 2023-2027 jyldarǵa arnalǵan sailaýaldy baǵdarlamasyn oryndaý aiasynda júrgizilýde.
Jalpy bul - aimaqtaǵy osyndai ekinshi nysan. Eske salsaq, ótken jyldyń qańtar aiynan oblys ortalyǵy Taldyqorǵan qalasynda 220 orynǵa arnalǵan Belsendi uzaq ómir súrý ortalyǵy óz jumysyn bastaǵan bolatyn.
