Biyl qazan aiynda elimiz kúres túrlerinen álem chempionatyn qabyldasa, 2027 jyly olimpiadalyq sport túrleri boiynsha ústel tennisi, dziýdo, boks, taekvondo, sondai-aq kibersport pen short-trekten jasóspirimder arasyndaǵy álem chempionattary uiymdastyrylady, dep habarlaidy dalanews.kz.
Elimizde iri halyqaralyq sport jarystaryn ótkizý – Memleket basshysynyń sportty damytý, eldiń halyqaralyq bedelin nyǵaitý jáne Qazaqstandy óńirdegi jetekshi sport ortalyqtarynyń birine ainaldyrý jónindegi tapsyrmalaryn júieli iske asyrýdyń nátijesi.
2027 jyly álem chempionattarynyń barlyǵy Astana qalasynda uiymdastyrylady. Atap aitqanda, short-trekten jasóspirimder arasyndaǵy álem chempionaty 28-31 qańtar aralyǵynda, bokstan álem chempionaty 10-26 sáýirde, ústel tennisinen álem chempionaty 22-30 mamyrda, dziýdodan álem chempionaty 7-14 maýsymda, al taekvondodan álem chempionaty 7-13 shilde kúnderi ótedi. Kibersporttan álem chempionatynyń naqty merzimi keiinirek jariialanady.
Táýelsiz Qazaqstan tarihynda alǵash ret elimiz eki jyl ishinde jeti álem chempionatyn ótkizý quqyǵyna ie boldy. Bul – Qazaqstannyń sport infraqurylymy men uiymdastyrýshy áleýetiniń joǵary deńgeide ekenin aiǵaqtaityn mańyzdy jetistik. Sonymen qatar bul álemdik sport qaýymdastyǵy aldyndaǵy zor jaýapkershilikti de bildiredi.
Álem chempionattaryna dúniejúziniń eń úzdik sportshylary qatysady dep josparlanǵan. Mundai dúbirli dodalar otandyq sporttyń damýyna tyń serpin berip, salamatty ómir saltyn keńinen nasihattaýǵa jáne jastardyń sportqa degen qyzyǵýshylyǵyn arttyrýǵa yqpal etedi.
Sonymen qatar aýqymdy halyqaralyq jarystar oqiǵalyq týrizmniń damýyna, qonaqúi biznesiniń jandanýyna, qyzmet kórsetý salasy men infraqurylymnyń damýyna oń áserin tigizip, Qazaqstannyń halyqaralyq imidjin odan ári nyǵaitady.
Osyndai deńgeidegi halyqaralyq jarystardy ótkizý – sport infraqurylymyn júieli damytý, jarystardy uiymdastyrý sapasyn arttyrý jáne halyqaralyq sport federatsiialarymen yntymaqtastyqty nyǵaitý baǵytynda júrgizilgen keshendi jumystyń nátijesi. Búginde Qazaqstan álemdik deńgeidegi eń iri sport jarystaryn halyqaralyq standarttarǵa sai uiymdastyra alatyn memleketterdiń qataryna senimdi túrde engenin atap ótken jón.
