"Sailaý? Sailaý feisbýktegi ómir men shynaiy ómirdiń arasyndaǵy alshaqtyqty aiqyn kórsetti. Feisbýkte batyr bolý, Qazaqstanda batyr bolýdy bildirmeidi eken.
Qosanovtyń belsendi úgit-nasihatshysy bola almadym. Saiasattanýǵa qatysty birneshe jobanyń jumysymen júrdim. Sonda da bolsa Qosanovty qoldaimyn. Onyń sailaýǵa qatysýy igilikti is boldy.
Ulttyq qoǵamdyq senim keńesi? Menińshe qazir ekonomikaǵa da, áleýmettik salaǵa da toqtalýdyń qajeti shamaly. Bul keńes eldegi saiasi ahýaldy ashyq talqylaýy tiis.
Onyń ishinde: sailaý týraly zań, partiialar jáne qoǵamdyq birlestikter týraly zań, BAQ týraly zań jáne mitingiler týraly zań eshbir halyqaralyq talaptarǵa sai kelmeidi.
Qoǵamdyq senim keńesi osy 5 zańnamany túbegeili ózgertip, olardy Batystyń standartyna beiimdep, eldegi demokratiianyń tynysyn ashatyn jaǵdaiǵa jetkizse, kúzge taman bulardy Parlamentiń talqysyna usynyp, qoldanysqa engizse, tek sodan soń baryp jańa sailaý ótetini týraly habarlaýǵa bolady.
Bul óz kezeginde jańa partiialardyń paida bolýyna, jańa oiynshylar men jańa oppozitsiialyq kúshterdiń qalyptasýyna qozǵaý bolar edi.
Ázirdiń ózinde ilgeridegi 5 zańnama ádiletti úlgide ózgerer bolsa, saiasi partiia retinde ún qatýǵa qabileti jetetin 4-5 jobany kórip turmyn.
Joq, bul áleýmettik jeliden árige asa almaityn Feisbýk jurtshylyǵy emes.
Olarǵa qaraǵanda áldeqaida salmaqty oiynshylar, biznesmender álgi zańnamalar ózgerse, saiasatqa bilek sybanyp aralasýǵa ázir tur.
Bul arada "buǵan bilik bara qoiar ma?" degen saýaldyń týyndaýy zańdy.
Buryn memlekettik deńgeidegi sheshimderin bárin bir adam qabyldaityn. Búgin bul jaǵdai ózgerdi. Belgili bir máseleniń sheshimin tabýyna yqpal ete alatyn ondaǵan adam men qurylymdar bar. Demokratiia týraly aitqanda mundai sheshim qabyldaityn tulǵalardyń sany ulǵaitý mańyzdy.
Nazarbaevtan keiingi kez-kelgen bilik burynǵydai bolmaidy.
Strategiialyq turǵydan qazirgi biliktiń aldynda eki tańdaý tur.
Munyń biri eldegi demokratiialyq qurylymdardyń talap-aryzyna qulaq asý nemese qyspaqty kúsheitý.
Muny bizdiń bilik jaqsy meńgergen. Onyń ishinde internetti buǵattaý, alańǵa shyqqandardyń qol-aiaǵyn matap, abaqtyǵa qamaý sekildi ádis-amaldar myń-san...", – deidi Aidos Sarym.
Ázirlegen, Dýman BYQAI
https://www.youtube.com/watch?v=HHq-oEXPZ7c&fbclid=IwAR10htJFohNhpd2w-AbLf7I4F2pYVnmY_4MOrb05rSxppdE3ZLu1obVQdDM
