"سايلاۋ؟ سايلاۋ فەيسبۋكتەگى ءومىر مەن شىنايى ءومىردىڭ اراسىنداعى الشاقتىقتى ايقىن كورسەتتى. فەيسبۋكتە باتىر بولۋ، قازاقستاندا باتىر بولۋدى بىلدىرمەيدى ەكەن.
قوسانوۆتىڭ بەلسەندى ۇگىت-ناسيحاتشىسى بولا المادىم. ساياساتتانۋعا قاتىستى بىرنەشە جوبانىڭ جۇمىسىمەن ءجۇردىم. سوندا دا بولسا قوسانوۆتى قولدايمىن. ونىڭ سايلاۋعا قاتىسۋى يگىلىكتى ءىس بولدى.
ۇلتتىق قوعامدىق سەنىم كەڭەسى؟ مەنىڭشە ءقازىر ەكونوميكاعا دا، الەۋمەتتىك سالاعا دا توقتالۋدىڭ قاجەتى شامالى. بۇل كەڭەس ەلدەگى ساياسي احۋالدى اشىق تالقىلاۋى ءتيىس.
ونىڭ ىشىندە: سايلاۋ تۋرالى زاڭ، پارتيالار جانە قوعامدىق بىرلەستىكتەر تۋرالى زاڭ، ب ا ق تۋرالى زاڭ جانە ميتينگىلەر تۋرالى زاڭ ەشبىر حالىقارالىق تالاپتارعا ساي كەلمەيدى.
قوعامدىق سەنىم كەڭەسى وسى 5 زاڭنامانى تۇبەگەيلى وزگەرتىپ، ولاردى باتىستىڭ ستاندارتىنا بەيىمدەپ، ەلدەگى دەموكراتيانىڭ تىنىسىن اشاتىن جاعدايعا جەتكىزسە، كۇزگە تامان بۇلاردى پارلامەنتىڭ تالقىسىنا ۇسىنىپ، قولدانىسقا ەنگىزسە، تەك سودان سوڭ بارىپ جاڭا سايلاۋ وتەتىنى تۋرالى حابارلاۋعا بولادى.
بۇل ءوز كەزەگىندە جاڭا پارتيالاردىڭ پايدا بولۋىنا، جاڭا ويىنشىلار مەن جاڭا وپپوزيسيالىق كۇشتەردىڭ قالىپتاسۋىنا قوزعاۋ بولار ەدى.
ءازىردىڭ وزىندە ىلگەرىدەگى 5 زاڭناما ادىلەتتى ۇلگىدە وزگەرەر بولسا، ساياسي پارتيا رەتىندە ءۇن قاتۋعا قابىلەتى جەتەتىن 4-5 جوبانى كورىپ تۇرمىن.
جوق، بۇل الەۋمەتتىك جەلىدەن ارىگە اسا المايتىن فەيسبۋك جۇرتشىلىعى ەمەس.
ولارعا قاراعاندا الدەقايدا سالماقتى ويىنشىلار، بيزنەسمەندەر الگى زاڭنامالار وزگەرسە، ساياساتقا بىلەك سىبانىپ ارالاسۋعا ءازىر تۇر.
بۇل ارادا "بۇعان بيلىك بارا قويار ما؟" دەگەن ساۋالدىڭ تۋىنداۋى زاڭدى.
بۇرىن مەملەكەتتىك دەڭگەيدەگى شەشىمدەرىن ءبارىن ءبىر ادام قابىلدايتىن. بۇگىن بۇل جاعداي وزگەردى. بەلگىلى ءبىر ماسەلەنىڭ شەشىمىن تابۋىنا ىقپال ەتە الاتىن ونداعان ادام مەن قۇرىلىمدار بار. دەموكراتيا تۋرالى ايتقاندا مۇنداي شەشىم قابىلدايتىن تۇلعالاردىڭ سانى ۇلعايتۋ ماڭىزدى.
نازاربايەۆتان كەيىنگى كەز-كەلگەن بيلىك بۇرىنعىداي بولمايدى.
ستراتەگيالىق تۇرعىدان قازىرگى بيلىكتىڭ الدىندا ەكى تاڭداۋ تۇر.
مۇنىڭ ءبىرى ەلدەگى دەموكراتيالىق قۇرىلىمداردىڭ تالاپ-ارىزىنا قۇلاق اسۋ نەمەسە قىسپاقتى كۇشەيتۋ.
مۇنى ءبىزدىڭ بيلىك جاقسى مەڭگەرگەن. ونىڭ ىشىندە ينتەرنەتتى بۇعاتتاۋ، الاڭعا شىققانداردىڭ قول-اياعىن ماتاپ، اباقتىعا قاماۋ سەكىلدى ءادىس-امالدار مىڭ-سان..."، – دەيدى ايدوس سارىم.
ازىرلەگەن، دۋمان بىقاي
https://www.youtube.com/watch؟v=HHq-oEXPZ7c&fbclid=IwAR10htJFohNhpd2w-AbLf7I4F2pYVnmY_4MOrb05rSxppdE3ZLu1obVQdDM
