1 mamyr merekesinde atalǵan emhananyń jumysshylary uıymdasqan túrde «jedel járdemmen» demalys uıymdastyrǵan. Sonda túsken sýretteri arada eki aı ótkende jýrnalıserdiń qolyna túsip qalypty. Fotolardyń birinde medısınalyq «Ýazıktiń» mańynda qoı etin borshalap jatqandar estelikke túsken bolsa, ekinshisinde de sol «jedel járdemniń» qasynda jaıylǵan demalys dastarhanyna jaıǵasqan qyzmetkerlerdiń qýanyshty kúıleri beınelengen. Alaıda olardyń qýanyshtary sý sepkendeı basyldy.
Óıtkeni OQO densaýlyq saqtaý basqarmasynyń basshysy Seıitjamal Pákeev sýretterdi kórip jaǵasyn ustapty. Sóıtip is-sharany anyqtaý úshin oblystyq ákimdiktiń ınspektory men densaýlyq saqtaý basqarmasynyń sheneýnikteri bastaǵan arnaıy kommısıa qurylyp, nátıjesinde úsh qyzmetker jumystan bosatylǵan. Olar – jedel járdem bóliminiń aǵa dárigeri, selfı jasaýshy feldsher jáne garaj meńgerýshisi. Al, Saryaǵash aýdandyq ortalyq emhanasynyń bas dárigeri Nurjan Aqberdıevke sógis berilgen. Óz kezeginde demalýshylar mingen «jedel járdemniń» rezervte turǵanyn alǵa tartypty. Kólikke zaqym kelgen joq, eshkim zardap shekpepti.
Osy aptada buqaralyq aqparat quraldarynda sol Saryaǵash aýdanynda 8 áıeldi bir «jedel járdemmen» alyp bara jatqan vıdeo paıda boldy. Onyń kóbi aıaǵy aýyr, edendegisi kúre tamyr arqyly tamshylatý emin qabyldap jatyr. Vıdeo bıyl shamamen sáýir aıynda túsirilgen.
– Bizdiń aýdanda aıyna 700-deı bala dúnıege keledi. Kún saıyn keminde 15 aıaǵy aýyr áıeldi oblystyq perınataldyq aýrýhanaǵa jetkizemiz. Úsh «jedel járdemniń» bireýi jaǵdaıy aýyr úsh áıeldi alyp ketti. Ekinshisi Shymkentke ınsýlt alǵan naýqasty alyp ketti. Úshinshisi aýyr mıokard ınfarktin alǵan adamdy kardıoortalyqqa alyp ketken. Sol kúni bizde basqa mashına bolmaǵan soń amalsyz áıelderdi solaı bir kólikpen jiberýge týra keldi, – dep aqtalǵan eken sol kezde Saryaǵash aýdandyq ortalyq emhanasynyń bas dárigeri Nurjan Aqberdıev.
Al rezerte turǵan «jedel járdemdi» saıahatqa arnaǵan... Bıyl Saryaǵash aýdanyna bulardan ózge qosymsha «jedel járdem» kólikteri bólinbegen de.
Derekkózi: rgmedia.kz
