1 مامىر مەرەكەسىندە اتالعان ەمحانانىڭ جۇمىسشىلارى ۇيىمداسقان تۇردە «جەدەل جاردەممەن» دەمالىس ۇيىمداستىرعان. سوندا تۇسكەن سۋرەتتەرى ارادا ەكى اي وتكەندە جۋرناليستەردىڭ قولىنا ءتۇسىپ قالىپتى. فوتولاردىڭ بىرىندە مەديسينالىق «ۋازيكتىڭ» ماڭىندا قوي ەتىن بورشالاپ جاتقاندار ەستەلىككە تۇسكەن بولسا، ەكىنشىسىندە دە سول «جەدەل جاردەمنىڭ» قاسىندا جايىلعان دەمالىس داستارحانىنا جايعاسقان قىزمەتكەرلەردىڭ قۋانىشتى كۇيلەرى بەينەلەنگەن. الايدا ولاردىڭ قۋانىشتارى سۋ سەپكەندەي باسىلدى.
ويتكەنى وقو دەنساۋلىق ساقتاۋ باسقارماسىنىڭ باسشىسى سەيىتجامال پاكەيەۆ سۋرەتتەردى كورىپ جاعاسىن ۇستاپتى. ءسويتىپ ءىس-شارانى انىقتاۋ ءۇشىن وبلىستىق اكىمدىكتىڭ ينسپەكتورى مەن دەنساۋلىق ساقتاۋ باسقارماسىنىڭ شەنەۋنىكتەرى باستاعان ارنايى كومميسيا قۇرىلىپ، ناتيجەسىندە ءۇش قىزمەتكەر جۇمىستان بوساتىلعان. ولار – جەدەل جاردەم ءبولىمىنىڭ اعا دارىگەرى، سەلفي جاساۋشى فەلدشەر جانە گاراج مەڭگەرۋشىسى. ال، سارىاعاش اۋداندىق ورتالىق ەمحاناسىنىڭ باس دارىگەرى نۇرجان اقبەردييەۆكە سوگىس بەرىلگەن. ءوز كەزەگىندە دەمالۋشىلار مىنگەن «جەدەل جاردەمنىڭ» رەزەرۆتە تۇرعانىن العا تارتىپتى. كولىككە زاقىم كەلگەن جوق، ەشكىم زارداپ شەكپەپتى.
وسى اپتادا بۇقارالىق اقپارات قۇرالدارىندا سول سارىاعاش اۋدانىندا 8 ايەلدى ءبىر «جەدەل جاردەممەن» الىپ بارا جاتقان ۆيدەو پايدا بولدى. ونىڭ كوبى اياعى اۋىر، ەدەندەگىسى كۇرە تامىر ارقىلى تامشىلاتۋ ەمىن قابىلداپ جاتىر. ۆيدەو بيىل شامامەن ءساۋىر ايىندا تۇسىرىلگەن.
– ءبىزدىڭ اۋداندا ايىنا 700-دەي بالا دۇنيەگە كەلەدى. كۇن سايىن كەمىندە 15 اياعى اۋىر ايەلدى وبلىستىق پەريناتالدىق اۋرۋحاناعا جەتكىزەمىز. ءۇش «جەدەل جاردەمنىڭ» بىرەۋى جاعدايى اۋىر ءۇش ايەلدى الىپ كەتتى. ەكىنشىسى شىمكەنتكە ينسۋلت العان ناۋقاستى الىپ كەتتى. ءۇشىنشىسى اۋىر ميوكارد ينفاركتىن العان ادامدى كارديوورتالىققا الىپ كەتكەن. سول كۇنى بىزدە باسقا ماشينا بولماعان سوڭ امالسىز ايەلدەردى سولاي ءبىر كولىكپەن جىبەرۋگە تۋرا كەلدى، – دەپ اقتالعان ەكەن سول كەزدە سارىاعاش اۋداندىق ورتالىق ەمحاناسىنىڭ باس دارىگەرى نۇرجان اقبەردييەۆ.
ال رەزەرتە تۇرعان «جەدەل جاردەمدى» ساياحاتقا ارناعان... بيىل سارىاعاش اۋدانىنا بۇلاردان وزگە قوسىمشا «جەدەل جاردەم» كولىكتەرى بولىنبەگەن دە.
دەرەككوزى: rgmedia.kz
