Quryltaidyń zań shyǵarý qyzmetiniń sapasyn arttyrýdyń negizgi tetikteriniń biri saraptamalyq-taldamalyq súiemeldeý bolýy tiis, dep habarlaidy dalanews.kz.
Bul týraly «Quryltai – zań shyǵarýshy biliktiń jańa arhitektýrasynyń negizi» atty sarapshylar platformasynda Parlamentarizm institýty Jariia zańnama jáne memlekettik basqarý ortalyǵynyń basshysy Sholpan Saimova málimdedi.
Sarapshynyń aitýynsha, konstitýtsiialyq reformany praktikalyq turǵyda iske asyrý jáne zań shyǵarýshy biliktiń bir palataly modeline kóshý qabyldanatyn sheshimderdiń sapasyna jańa talaptar qoiady. Quryltai sailaýynyń taǵaiyndalýy saiasi júie men memlekettik basqarý modelin tolyqqandy jańǵyrtýdyń alǵashqy qadamy boldy. Sondyqtan zań shyǵarý protsesin kásibi turǵydan súiemeldeýdiń mańyzy erekshe artyp otyr.
Sholpan Saimova qazirgi zamanǵy zań shyǵarý qyzmeti tereń ǵylymi taldaýsyz, yqtimal saldardy baǵalaýsyz jáne zańnamalyq bastamalarǵa kásibi saraptama júrgizýsiz múmkin emestigin atap ótti. Quryltaiǵa usynylatyn árbir bastama quqyqtyq turǵydan ǵana emes, sonymen qatar onyń ekonomikalyq, áleýmettik jáne ekologiialyq yqpaly eskerile otyryp baǵalanýy qajet.
Sarapshy atap ótkendei, Quryltaidy qalyptastyrýdyń jańa qaǵidalary partiialyq baǵdarlamalardyń jáne zańnamalyq bastamalardyń sapasynyń mańyzyn arttyrady. Osyǵan bailanysty qabyldanatyn sheshimderdi ǵylymi jáne taldamalyq turǵydan súiemeldeýge qabiletti sarapshylar qaýymdastyǵynyń róli kúsheie túsedi. Onyń aitýynsha, saraptamalyq-taldamalyq qamtamasyz etý jańa zań shyǵarýshy organ qyzmetiniń ajyramas bóligine ainalýy tiis.
Sholpan Saimovanyń pikirinshe, bul úderiste úlken derekter kólemin taldaýǵa, zańnamadaǵy yqtimal qaishylyqtardy anyqtaýǵa jáne qabyldanatyn sheshimderdiń saldaryn dálirek boljaýǵa múmkindik beretin zamanaýi aqparattyq-taldamalyq júieler men jasandy intellekt tehnologiialary erekshe ról atqarýǵa tiis.
Sarapshy sondai-aq tiimdi zań shyǵarý qyzmeti ǵylymi qaýymdastyqtyń, kásibi birlestikterdiń, biznes ókilderiniń, azamattyq qoǵam institýttarynyń jáne óńirlik sarapshylardyń keńinen qatysýynsyz múmkin emes ekenin aitty. Mundai tásil qabyldanatyn sheshimderdiń ǵylymi negizdiligin qamtamasyz etip, azamattardyń zań shyǵarý protsesine degen senimin arttyrýǵa múmkindik beredi.
Sholpan Saimovanyń aitýynsha, Quryltai sailaýy ókildi institýttardy damytý zań shyǵarý rásimderin jetildirýmen, olardyń ashyqtyǵy men qoǵam aldyndaǵy jaýapkershiligin arttyrýmen qatar júretin dáiekti saiasi jańǵyrtýdyń bir bóligi bolyp tabylady. Sondyqtan zańdardyń sapasy memlekettik basqarýdyń jańa modeliniń tiimdiligin aiqyndaityn negizgi faktorlardyń birine ainalady.
Memlekettik organdardyń, jetekshi taldaý ortalyqtarynyń, ǵylymi qaýymdastyqtyń, joǵary oqý oryndarynyń, qoǵamdyq uiymdardyń jáne sarapshylar qaýymdastyǵynyń ókilderin biriktirgen sarapshylar platformasyn Qazaqstan Respýblikasynyń Prezidenti janyndaǵy Qazaqstannyń strategiialyq zertteýler institýty uiymdastyrdy.
