Eýraziialyq turaqtandyrý jáne damý qorynyń Makroekonomikalyq boljaý jáne zertteýler bóliminiń bastyǵy Marina Grichik Qazaqstanda infliatsiia 2026 jyldyń qys mezgilinen keiin baiaýlaidy dep boljaidy. Bul týraly ol Astanada ótken baspasóz máslihatynda aitty, dep habarlaidy Dalanews.kz.
Sarapshy Qazaqstandaǵy aqsha-kredit saiasaty qatań kúiinde saqtalatynyn jáne orta merzimdi perspektivada infliatsiiany nysanaly mánderge (5%) keltirýge baǵyttalatynyn aitady.
"Osyǵan bailanysty biz bazalyq mólsherleme jyl sońyna deiin ózgerissiz qalady dep boljaimyz. Valiýta baǵamyna keletin bolsaq, biz qazirgi baǵa jyl sońyna deiin saqtalady dep esepteimiz, al 2026-2027 jyldar shamaly álsireidi", - dedi Marina Grichik.
Qazaqstan ekonomikasy 2025 jyldyń I-toqsanynda JIÓ-niń 5,6%-ǵa artýy turǵynda naqty ósimdi kórsetti, degenmen toqsan saiynǵy ósim 0,6%-ǵa deiin baiaýlady. Ósimniń negizgi draiverleri transport, qoima, óńdeý jáne taý-ken ónerkásibi, sondai-aq qurylys salasy boldy. Bul rette infliatsiialyq qysym óse túsip, mamyr aiynda 11,3%-ǵa deiin ekpin aldy. Ulttyq bank bazalyq mólsherlemeni naýryz aiynan bastap 16,5% deńgeiinde ózgerissiz qaldyrýda.
Eýraziialyq turaqtandyrý jáne damý qorynyń boljamy boiynsha, 2025 jyly Qazaqstannyń JIÓ-niń naqty ósimi 5%-dy quraidy dep kútiledi, keiinnen 2026-2027 jyldary 4,5% jáne 4,3% -ǵa deiin baiaýlaýy múmkin.
"Infliatsiia nysanaly kórsetkishten joǵary bolyp qala beredi, al teńge baǵamy 2027 jylǵa qarai Ulttyq qordan alynatyn transfertterdiń qysqarýy yqtimaldyǵy, sondai-aq saýda áriptesterimen salystyrǵanda anaǵurlym joǵary infliatsiianyń saqtalýy aiasynda 1 AQSh dollarynyń quny 560 teńge bolýy múmkin", - deidi sarapshy.
Buǵan deiin Eýraziialyq turaqtandyrý jáne damý qorynyń bas mamany Sergei Ýlatov AQSh tarifiniń Qazaqstan ekonomikasyna áserine qatynasty pikir bildirgen.
