Qarjylyq monitoring agenttigi alaiaqtar agenttik atynan jalǵan resmi hattar taratyp jatqanyn eskertti, dep habarlaidy dalanews.kz.
Agenttikke osyndai jalǵan hat taratýdyń taǵy bir deregi týraly aqparat túsken. Memlekettik organǵa joldanǵan hatta qaskóiler tekseris júrgizilip jatqanyn alǵa tartyp, azamat týraly málimetti, sonyń ishinde onyń minezdemesi men ózge de aqparatty suratqan.
Buǵan deiin de alaiaqtar osyǵan uqsas tásildi qoldanǵan. Olar jalǵan hattar jibergennen keiin azamattarǵa telefon nemese messendjer arqyly habarlasyp, ózderin QMA qyzmetkerleri retinde tanystyrǵan. Túrli syltaýmen azamattardyń jeke jáne bank deregin alýǵa tyrysqan nemese aqsha bopsalaǵan.
Azamattarǵa mynadai eskertý jasaldy:
- agenttiktiń resmi hattary tek belgilengen tártippen joldanady;
- QMA qyzmetkerleri telefon arqyly bank shottarynyń deregin berýdi nemese aqsha aýdarýdy talap etpeidi;
- qujatta logotip, mór nemese qoltańba bar ekenine súienip, oǵan senýge bolmaidy;
- kúmándi hat alsańyz, onyń shynaiylyǵyn agenttiktiń resmi bailanys arnalary arqyly tekserińiz.
