Jýrnalist Mihail Kozachkov Qaraǵandy oblysy sport basqarmasynyń basshysy Serik Sápiev pen onyń orynbasary Dáýren Esimhanov arasyndaǵy tóbeleske bailanysty Memlekettik qyzmet isteri agenttigi júrgizgen tekserýdiń nátijelerin jariialady, dep habarlaidy Dalanews.kz.
Janjal ótken aptada, 23 qańtar kúni bolǵan. Oqiǵadan soń bokstan Olimpiada chempiony Serik Sápiev orynbasarymen aradaǵy kelispeýshilik onyń zańsyz áreketterine bailanysty týyndaǵanyn málimdegen edi.
Keiinirek Qaraǵandy oblysynyń ákimi Ermaǵanbet Bólekpaev ta pikir bildirip, qoǵamdy asyǵys qorytyndy jasamaýǵa shaqyrǵan. Ol Memlekettik qyzmet isteri agenttiginiń aýmaqtyq departamenti tekseris júrgizip jatqanyn aityp, naqty sheshimdi sol qorytyndydan keiin qabyldaý qajet ekenin jetkizgen bolatyn.
Alaida jýrnalistke joldanǵan resmi qujatta janjaldyń barlyq mán-jaiy tolyq zerdelenip, oqiǵaǵa Serik Sápievtiń ózi kináli degen qorytyndy jasalǵany kórsetilgen.
Qujatqa Memlekettik qyzmet isteri agenttigi departamentiniń bas mamandary Rysqulbek pen Temirjanov qol qoiǵan.
Tekserý qorytyndysynda Qaraǵandy oblysynyń sport basqarmasynyń basshysy Serik Sápievtiń áreketterinen memlekettik qyzmetshilerdiń Ádep kodeksiniń birqatar talaptaryn buzý belgileri anyqtalǵany jazylǵan.
Atap aitqanda, qujatta onyń:
– QR Memlekettik qyzmetshileriniń Ádep kodeksiniń 6-tarmaǵy 5) tarmaqshasyn;
– 8-tarmaqtyń 1) jáne 7) tarmaqshalaryn buzǵany kórsetilgen.
Tekserý materialynda bul buzýshylyqtar:
– azamattardyń kóz aldynda memlekettik organdardyń abyroiy men bedeline nuqsan keltiretin áreketterge barý;
– ujym ishinde iskerlik ári syilastyqqa negizdelgen qarym-qatynastyń qalyptasýyna yqpal etpeý;
– áriptesine qatysty ádepsizdik pen orynsyz minez-qulyq tanytý túrinde kórinis tapqany atap ótilgen.
Osylaisha Memlekettik qyzmet isteri agenttiginiń departamenti janjalǵa basqarma basshysy Serik Sápievtiń jaýapty ekenin kórsetken resmi qorytyndy shyǵarǵan.
Jýrnalist Aqyrys Seiitqazy qujatta Sápievti kináli etip shyǵarǵanǵa, bul istiń artynda basshylar turǵan bolýy múmkin ekenin aitady.
"Serik Sápievke qatysty qujattardy Kozachkovqa kim bergen? Sápievti kináli etip shyǵarǵanyna qaraǵanda, munyń artynda da sol oblys basshylary turǵany anyq. Bul oqiǵadan bir nársege kózim jetti. Qansha jerden Olimpiadany baǵyndyrsań da, bylyqqa batqan júieni ózgerte almaisyń. Sápiev kabinetine basyp kirip, shý shyǵarǵany úshin jazalanatyn shyǵar. Biraq bekerden beker shý shyǵarmaǵany taǵy anyq qoi. Barlyq jerde óz adamy, barmaq basty, kóz qysty... Osydan soń, sporttan birdeńe kútemiz...", - dep jazdy jýrnalist.
