Saparbaev menshikti tilshilerdi belsendi bolýǵa shaqyrdy
– Men keibir respýblikalyq basylymdardan Aqtóbe týraly materialdardy óte sirek oqimyn. Máselen, «Liter» men «Aiqyn» gazetterinde Aqtóbe oblysy týraly, ókinishke qarai, material joqtyń qasy, – dedi Berdibek Saparbaev.
Óńir basshysy ózge oblystardaǵy belsendi jýrnalisterdiń esimin de atap ótti.
– Máselen, Qyzylorda oblysynan Miýa Bainazar degen jýrnalist bar. Nómir saiyn eki-úsh material jariialaidy. Shymkentte qyzmette bolǵanymda, «Ekspress-K» gazetiniń Irina Galýshko degen menshikti tilshisi de kúnine birneshe aqparat beretin, – deidi ákim.
Oblys basshysy jýrnalisterdi belsendi bolýǵa shaqyrdy.
– Ásirese, respýblikalyq basylymdardyń menshikti tilshileri, belsendi túrde jumys jasaýlaryńyzdy suraimyn. Oblysta jazatyn dúnie kóp, – dedi ol.
Óz kezeginde, «Quqyqtyq media ortalyǵynyń» zańgeri Gúlmira Birjanovanyń «Tilshige» habarlaýynsha, otandyq jýrnalistikada aqysy tólenbese, birqatar basylymdar materialdar jariialai bermeidi. Zańger máseleniń memlekettik tapsyrysqa tireletinin jasyrmaidy.
– Jalpy, elimzidegi kóptegen aqparat quraldary memlekettik tapsyrys aiasynda bilik organdarynan, onyń ishinde jergilikti ákimdikterden qarajat alyp, sonyń aiasynda ǵana, belgili bir óńir týraly materialdar ázirleidi. Eger ákimdik aqsha tólemese, ol óńir týraly material jariialamaý kerek degen túsinik bar, – deidi Gúlmira Birjanova.
Zańgerdiń aitýynsha, Qazaqstandaǵy aqparat quraldary ońai aqshaǵa úirengeni sol, básekege qabiletti bolýǵa talpynys jasamaidy.
– Qyzyqty dúnieler jazbaidy, saraptama az, respýblikalyq basylymdardyń deni resmi qujattar men tapsyrys aiasyndaǵy maqtaý materialdarmen betterin toltyryp keledi. Ony kózi qaraqty oqyrman da biledi, – deidi ol.
– Memlekettik tapsyrys aiasynda jariialanatyn materialdardyń sapasyna quzyrly komitet te tiisti deńgeide nazar aýdarmaityn sekildi. Qansha material, onyń kólemi qandai, hronometrajy qansha sekýnd dep esepteidi de, tapsyrys qarajatyn igere salady. Al onyń sapasy men mazmuny týraly áńgime bólek. Bastysy, tapsyrys bergende bir maqsat bolady ǵoi. Menińshe, tapsyrys aiasynda kózdelgen maqsat oryndalmai otyr, — deidi Gúlmira Birjanova «Tilshige» bergen suhbatynda.
Aita keteiik, byltyr meditsina qyzmetkerlerimen bolǵan kezdesýinde qazaq baspasózi týraly jýrnalistikaǵa jaqyn adamdardyń biri saýal tastaǵan-dy. «Sizdi qazaq tiliniń janashyry retinde bilemin, sondyqtan qolqa salyp otyrmyn. «Ana tili» basylymynyń taralymyn kóbeitip berseńiz» degen sarynda suraq qoidy.
Áńgime aýanyn túsingen bolý kerek, Berdibek Saparbaev qysqa qaiyrdy. «Eger gazet qyzyqty bolsa, oǵan kúshtep jazdyrýǵa bolmaidy. Oqylymdy dúnie bolsa, oqyrman ózi izdep oqidy» degen bolatyn oblys basshysy.
«Tilshiniń» habarlaýynsha, Berdibek Saparbaev jyl basynda qurylǵan «Aqtóbe aqparat» ortalyǵynyń jumysy týraly da aita ketti.
– Búginde aqparat quraldaryna kúnine birneshe aqparat jiberip otyramyz. Unasa alyńyz, unamasa jaba salyńyz. Kúnine kóptegen kezdesýler uiymdastyrylady. Onyń barlyǵyna birdei jýrnalister kele bermeidi. «Aqtóbe aqparat» ortalyǵy sondai otyrystardan únemi material daiyndap, aqparat quraldaryna taratyp otyr, dedi Saparbaev.
Asqar AQTILEÝ
