Qarjyger-maman Iliias Isaev "Samuryq-Qazyna" ulttyq ál-aýqat qoryn taratý týraly máseleniń Májilis qabyrǵasynda kóterilýin kezdeisoqtyq emes ekenin aitady, dep habarlaidy Dalanews.kz.
Onyń aitýynsha, bul qorǵa reformalaý sipatynda byltyrdan bastap "túren" salynǵan. Al biyl, 2025 jyly 27 qańtarda ótken Úkimettiń keńeitiligen otyrysynda Memleket basshysy "Samuryq-Qazyna" Ulttyq ál-aýqat qoryn reformalaý barysyna kóńili tolmaitynyn jetkizgen, sóitip aqpan aiynda bul máseleni mai-shammen qaraitynyn aitqan. Al 21 aqpanda Prezident Joǵary aýditorlyq palata tóraǵasy Álihan Smailovty qabyldaǵanda "Samuryq-Qazyna" men birqatar ulttyq kompaniialarlarǵa aýditorlyq tekseris júrgiziletini de belgili boldy.
"Menińshe, osy aýditorlyq tekseris jumystary áli aiaqtalmai jatyr. Árine, qordaǵy kompaniialar, olardyń enshilesteri, taǵy filialdary, olarmen seriktese jumys istegen qarjy instýttary dep tekserip kete berse, bul - uzaqqa sozylatyn protsess. Eń bastysy, memleket ishindegi memleket ispetti bul qor ekonomikany ońtailandyrý emes, úlken aqshany urlaý, sonyń izin jasyrý isterimen ainalysatyn siiaqty. Áitpese, qor ishindegi keibir kompaniialar kezinde jyl qorytyndysy boiynsha minýsqa ketip jatsa da olardyń menedjerleri báribir qyryp bonýstar alatyn. Muny qalai túsinýge bolady? Buǵan airan-asyr bolyp, másele kótergenimizben osy kúnge deiin oǵan jaýap ala alǵan emespiz. Árine, bul qordyń taralǵanyn quptaimyn", - deidi Iliias Isaev óz kezeginde.
Qarjygerdiń aitýynsha, Prezident aýdit qorytyndysyn kútip otyrǵan bolýy kerek.
"Ótkende Memleket basshysy Qazaqstan damý bankin qatty synǵa aldy.
Sol kezde "Samuryq-Qazynany" da aityp qalady ma" dep kútken edik. Biraq, bul rette ol kisi únsiz qaldy. Soǵan qaraǵanda, bálkim aýdit qorytyndylary áli shyqpaǵan bolar", - deidi maman.
Qarjygerdiń pikirinshe, shetelge toqtamai, aǵylyp ketip jatqan aqshanyń artynda osy "úlken qus" turǵan sekildi.
"Menińshe, osy "Samuryq-Qazyna" qory joǵalsa, eski Qazaqstannyń da dáýiri támamdalatyn siiaqty", - deidi Isaev.
Sóz sońynda ol "Báiterek" holdingi "Samuryq-Qazynanyń" "bólesi" ekenin eske sala otyryp, sońǵysyn taratsa, onda holdingpen bailanysty qordalanǵan máseleni sheshý onsha aýyr bolmaitynyn aitady. Óitkeni, salystyrmaly túrde atalǵan qorǵa qaraǵanda holding kólemi shaǵyndaý eken.
Aita ketsek, 2025 jyly 19 mamyrda Májilis depýtaty Ádil Jubanov "Samuryq-Qazyna" qoryn taratýdy usyndy. Sóitken ol ózin mazalaǵan suraqtardy sol kúni Májiliske biýdjet aqshasynyń igerilýi boiynsha esep berýge kelgen Joǵary aýditorlyq palata múshesi Nurlan Nurjanovqa qoiyp kórdi.
"Bir de bir otbasy múshesi kásipkerlikpen ainalyspaǵan, biraq bizde óte bai turatyn azamattardy bilemiz. Biz urlaýǵa yńǵaily bolý úshin barlyq bailyqty bir qolǵa ustatamyz. Jalpy, men "Samuryq-Qazyna" qyzmetine qarsymyn, ony taratý kerek, ol básekelestik ortaǵa berilýi kerek. Sizdiń "Samuryq-Qazynaǵa" qatysty kózqarasyńyz qandai?".
Aýditor bul másele ózderin de qatty alańdatatynyn aita kele: "Qazirgi ýaqyttaǵy jaǵdailardy eskere otyryp, biz "Samuryq-Qazynaǵa" aýdit júrgizetin bolamyz. Bizdiń josparymyz boiynsha ol shilde aiynda aiaqtalady, mine, sol kezde biz sizge tolyq esep pen usynystarymyzdy kórsetemiz", dep jaýap qatty.
