قارجىگەر-مامان ءىلياس يسايەۆ "سامۇرىق-قازىنا" ۇلتتىق ءال-اۋقات قورىن تاراتۋ تۋرالى ماسەلەنىڭ ءماجىلىس قابىرعاسىندا كوتەرىلۋىن كەزدەيسوقتىق ەمەس ەكەنىن ايتادى، دەپ حابارلايدى Dalanews.kz.
ونىڭ ايتۋىنشا، بۇل قورعا رەفورمالاۋ سيپاتىندا بىلتىردان باستاپ "تۇرەن" سالىنعان. ال بيىل، 2025 جىلى 27 قاڭتاردا وتكەن ۇكىمەتتىڭ كەڭەيتىلىگەن وتىرىسىندا مەملەكەت باسشىسى "سامۇرىق-قازىنا" ۇلتتىق ءال-اۋقات قورىن رەفورمالاۋ بارىسىنا كوڭىلى تولمايتىنىن جەتكىزگەن، ءسويتىپ اقپان ايىندا بۇل ماسەلەنى ماي-شاممەن قارايتىنىن ايتقان. ال 21 اقپاندا پرەزيدەنت جوعارى اۋديتورلىق پالاتا ءتوراعاسى ءاليحان سمايلوۆتى قابىلداعاندا "سامۇرىق-قازىنا" مەن ءبىرقاتار ۇلتتىق كومپانيالارلارعا اۋديتورلىق تەكسەرىس جۇرگىزىلەتىنى دە بەلگىلى بولدى.
"مەنىڭشە، وسى اۋديتورلىق تەكسەرىس جۇمىستارى ءالى اياقتالماي جاتىر. ارينە، قورداعى كومپانيالار، ولاردىڭ ەنشىلەستەرى، تاعى فيليالدارى، ولارمەن سەرىكتەسە جۇمىس ىستەگەن قارجى ينستۋتتارى دەپ تەكسەرىپ كەتە بەرسە، بۇل - ۇزاققا سوزىلاتىن پروسەسس. ەڭ باستىسى، مەملەكەت ىشىندەگى مەملەكەت ىسپەتتى بۇل قور ەكونوميكانى وڭتايلاندىرۋ ەمەس، ۇلكەن اقشانى ۇرلاۋ، سونىڭ ءىزىن جاسىرۋ ىستەرىمەن اينالىساتىن سياقتى. ايتپەسە، قور ىشىندەگى كەيبىر كومپانيالار كەزىندە جىل قورىتىندىسى بويىنشا مينۋسقا كەتىپ جاتسا دا ولاردىڭ مەنەدجەرلەرى ءبارىبىر قىرىپ بونۋستار الاتىن. مۇنى قالاي تۇسىنۋگە بولادى؟ بۇعان ايران-اسىر بولىپ، ماسەلە كوتەرگەنىمىزبەن وسى كۇنگە دەيىن وعان جاۋاپ الا العان ەمەسپىز. ارينە، بۇل قوردىڭ تارالعانىن قۇپتايمىن"، - دەيدى ءىلياس يسايەۆ ءوز كەزەگىندە.
قارجىگەردىڭ ايتۋىنشا، پرەزيدەنت اۋديت قورىتىندىسىن كۇتىپ وتىرعان بولۋى كەرەك.
"وتكەندە مەملەكەت باسشىسى قازاقستان دامۋ بانكىن قاتتى سىنعا الدى.
سول كەزدە "سامۇرىق-قازىنانى" دا ايتىپ قالادى ما" دەپ كۇتكەن ەدىك. ءبىراق، بۇل رەتتە ول كىسى ءۇنسىز قالدى. سوعان قاراعاندا، بالكىم اۋديت قورىتىندىلارى ءالى شىقپاعان بولار"، - دەيدى مامان.
قارجىگەردىڭ پىكىرىنشە، شەتەلگە توقتاماي، اعىلىپ كەتىپ جاتقان اقشانىڭ ارتىندا وسى "ۇلكەن قۇس" تۇرعان سەكىلدى.
"مەنىڭشە، وسى "سامۇرىق-قازىنا" قورى جوعالسا، ەسكى قازاقستاننىڭ دا ءداۋىرى ءتامامدالاتىن سياقتى"، - دەيدى يسايەۆ.
ءسوز سوڭىندا ول "بايتەرەك" حولدينگى "سامۇرىق-قازىنانىڭ" "بولەسى" ەكەنىن ەسكە سالا وتىرىپ، سوڭعىسىن تاراتسا، وندا حولدينگپەن بايلانىستى قوردالانعان ماسەلەنى شەشۋ ونشا اۋىر بولمايتىنىن ايتادى. ويتكەنى، سالىستىرمالى تۇردە اتالعان قورعا قاراعاندا حولدينگ كولەمى شاعىنداۋ ەكەن.
ايتا كەتسەك، 2025 جىلى 19 مامىردا ءماجىلىس دەپۋتاتى ءادىل جۇبانوۆ "سامۇرىق-قازىنا" قورىن تاراتۋدى ۇسىندى. سويتكەن ول ءوزىن مازالاعان سۇراقتاردى سول كۇنى ماجىلىسكە بيۋدجەت اقشاسىنىڭ يگەرىلۋى بويىنشا ەسەپ بەرۋگە كەلگەن جوعارى اۋديتورلىق پالاتا مۇشەسى نۇرلان نۇرجانوۆقا قويىپ كوردى.
"ءبىر دە ءبىر وتباسى مۇشەسى كاسىپكەرلىكپەن اينالىسپاعان، ءبىراق بىزدە وتە باي تۇراتىن ازاماتتاردى بىلەمىز. ءبىز ۇرلاۋعا ىڭعايلى بولۋ ءۇشىن بارلىق بايلىقتى ءبىر قولعا ۇستاتامىز. جالپى، مەن "سامۇرىق-قازىنا" قىزمەتىنە قارسىمىن، ونى تاراتۋ كەرەك، ول باسەكەلەستىك ورتاعا بەرىلۋى كەرەك. ءسىزدىڭ "سامۇرىق-قازىناعا" قاتىستى كوزقاراسىڭىز قانداي؟".
اۋديتور بۇل ماسەلە وزدەرىن دە قاتتى الاڭداتاتىنىن ايتا كەلە: "قازىرگى ۋاقىتتاعى جاعدايلاردى ەسكەرە وتىرىپ، ءبىز "سامۇرىق-قازىناعا" اۋديت جۇرگىزەتىن بولامىز. ءبىزدىڭ جوسپارىمىز بويىنشا ول شىلدە ايىندا اياقتالادى، مىنە، سول كەزدە ءبىز سىزگە تولىق ەسەپ پەن ۇسىنىستارىمىزدى كورسەتەمىز"، دەپ جاۋاپ قاتتى.
