Bul týraly Bolat Jámishevtiń tóraǵalyǵymen ótken «Samuryq-Qazyna» UÁQ Qoǵamdyq keńesiniń otyrysynda qordyń basqarýshy direktory Ǵibrat Aýǵanov habarlady. Qoǵamdyq keńestiń kezekti ashyq otyrysy «Samuryq-Qazyna» qoryna qaraityn kompaniialardaǵy eńbekti qorǵaý máselesine arnaldy.
Oǵan keńes múshelerimen qatar, qazaqstandyq qoǵam belsendileri, saiasatkerler men sarapshylar qatysty. «Samuryq-Qazyna» qorynyń qoǵammen bailanys, áleýmettik-eńbek qatynastary jáne eńbekti qorǵaý boiynsha basqarýshy direktory Ǵibrat Aýǵanovtyń aitýynsha, 2022 jyly qolǵa alynǵan sharalardyń nátijesinde kompaniialar tobyndaǵy jalpy jaraqattaný deńgeii 2021 jylmen salystyrǵanda 16% qysqarǵan.
LTIF jaraqattaný koeffitsienti, iaǵni jumysshynyń ýaqytsha eńbekke jaramsyzdyǵyna ákelgen jaraqattardyń jiiligi 0,16-ny qurasa, ólim jaǵdailarynyń koeffitsienti 11%-ǵa tómendedi. Ǵibrat Aýǵanov bul rette portfeldik kompaniialar men táýeldi, enshiles uiymdardyń birinshi basshylarynyń jeke jaýapkershiligin arttyrý qolǵa alynǵanyn atap ótti.
«Onyń aiasynda Qazaqtelekom, KEGOC, QazaqGaz jáne Samruk-Kazyna Ondeu kompaniialarynda Qor tájiribesine súiene otyryp alǵash ret óndiristik qaýipsizdik boiynsha mamandandyrylǵan forýmdar ótkizildi. Onda táýeldi enshiles uiymdar men qurylymdyq bólimshelerdiń basshylary óndiristik qaýipsizdik boiynsha óz moinyna jeke mindettemelerdi aldy. Budan bólek, portfeldik kompaniialardyń birinshi basshylary keminde 2 aida 1 ret enshiles, táýeldi uiymdardyń óndiristik alańdaryna baryp, tekserý júrgizý tártibi belgilendi. Bul jumys qazirgi tańda da júrgizilip jatyr. 2022 jyly mundai 43 tekserý boldy», – dedi Ǵibrat Aýǵanov.
Sondai-aq, ol Ulybritaniianyń Qaýipsizdik tehnikasy jáne densaýlyq saqtaý institýty maquldaǵan «Eńbek qaýipsizdiginiń mádenieti» atty korporativtik oqý kýrsyn ázirlengenine nazar aýdardy. Bul kýrs boiynsha óndiristik qyzmetkerlerdi 100% oqytýdy josparlanǵan.
