Qazaqstanda elektrosamokattardyń qatysýymen bolatyn jol apattary máselesi qaita kóterildi, dep habarlaidy dalanews.kz.
Ishki ister ministrligi Úkimet otyrysynda el boiynsha keminde 2 myń shaqyrym velojol qajet ekenin málimdedi. Bul másele Almatyda samokat mingen 54 jastaǵy er adamnyń jol apatynan qaza tapqanynan birneshe kún ótken soń aityldy.
18 qyrkúiekte Almatynyń Shyǵys ainalma jolynda 54 jastaǵy er adam elektrosamokatpen júrip kele jatyp qaza tapqan. Politsiianyń aldyn ala málimetinshe, onyń jyldamdyǵy saǵatyna shamamen 90 shaqyrym bolǵan. Ol joldyń sol jaq jiegimen qozǵalyp, kólikti basyp ozbaq bolǵan kezde basqarýdy joǵaltyp, asfaltqa qulaǵan. Er adam alǵan jaraqatynan oqiǵa ornynda kóz jumdy.
Politsiianyń málimetinshe, jyl basynan beri Almatyda elektrosamokattardyń qatysýymen 91 jol-kólik oqiǵasy tirkelip, 96 adam jaraqat alǵan. 18 qyrkúiektegi jaǵdai qaladaǵy biylǵy alǵashqy ólimmen aiaqtalǵan samokat apaty retinde tirkeldi.
Osy máselege Úkimet otyrysynda Ishki ister ministrligi de nazar aýdardy.
IIM ókiliniń aitýynsha, samokattarǵa qatysty talap zańmen rettelgen. Qazir olardyń trotýarmen júrýine tyiym salynǵan. Elektrosamokat júrgizýshileri velojolmen nemese velojolaqpen júrýi tiis, al mundai infraqurylym bolmaǵan jaǵdaida joldyń tiisti bóligimen qozǵalady.
Alaida ministrlik samokattarǵa qoiylǵan jańa talaptardy oryndaý úshin óńirlerde tiisti infraqurylym bolýy qajet ekenin atap ótti.
Qazaqstan boiynsha keminde 2 myń shaqyrymnan astam velojol qajet. Qazirgi tańda elde nebári 937 shaqyrym velojol bar.
«Oljas Abaiuly! Osy zańdy ázirleý barysynda Siz eki jyl boiy velosiped infraqurylymyn damytý qajettigine birneshe ret nazar aýdardyńyz. Tiisti tapsyrmalar berildi. Alaida óńirlerde bul másele tiisti deńgeide sheshilip jatqan joq. Qazaqstan boiynsha keminde 2 myń shaqyrym velojol qajet. Búginde is júzinde nebári 937 shaqyrym velojol bar. Bul másele ásirese megapolister úshin ózekti. Mysaly, Almatyda 12 myńnan astam samokat bar, al velojoldardyń uzyndyǵy nebári 89 shaqyrym», – dedi IIM ókili Úkimet otyrysynda.
Másele ásirese iri qalalar úshin ózekti. Mysaly, Almatyda 12 myńnan astam samokat bar, al velojoldardyń uzyndyǵy 89 shaqyrymdy quraidy. Almaty ákimdiginiń málimetinshe, qaladaǵy veloinfraqurylymnyń jalpy uzyndyǵy da 89 shaqyrym shamasynda.
IIM málimetinshe, samokattardyń trotýardan shyǵarylýy jol qaýipsizdigine qatysty talaptardyń kúsheiýimen bailanysty. Sonymen qatar ministrlik ákimdikter tiisti infraqurylymdy qamtamasyz etýi kerek ekenin aitty.
Buǵan deiin Bas prokýratýra da 2026 jylǵy 25 tamyzdan bastap elektrosamokattardyń trotýarlar men jaiaý júrginshiler joldarymen júrýine tyiym salynǵanyn habarlaǵan. Velojol nemese velojolaq bar bolsa, samokatshylar sol jolmen júrýi tiis. Al olar bolmaǵan jaǵdaida joldyń oń jaq shetimen nemese jol jiegimen qozǵalý talap etiledi.
Másele samokattardyń ózimen ǵana shektelmeidi. IIM jol qozǵalysyna qatysýshylardyń qaýipsizdigin qamtamasyz etý úshin infraqurylym qatar damýy qajet ekenin atap ótti.
Ministrlik Qazaqstan boiynsha velojoldar jelisin keńeitý máselesin ákimdikterdiń kún tártibinde turǵan mańyzdy mindetterdiń biri retinde kórsetti.
