"Saliqaly urpaq" qory sý tasqynynan zardap shekken aýyldarǵa kiiz úiler jiberdi. Halyqtyń suranysyna orai satyp alynǵan jylý Arqalyq qalasyna qarasty "Ekidiń" jáne "Qyzyl juldyz" eldi mekenderine jóneltildi, habarlaidy Dalanews.kz.
Qostanai óńirindegi bul aýyldardy sý basyp, úiler qirap, sharasyz qalǵan halyq túgel kóshirilgen edi. Sondyqtan, "Saliqaly urpaq" qoǵamdyq qorynyń músheleri jergilikti turǵyndardyń jan-aiqaiyn tyńdap, qandai muqtajdyq basym ekendigin bilip, jaǵdaidy kózben kórý úshin osy aýyldarǵa arnaiy barǵan edi. Ýaqytsha panalaityn kiiz úi suraǵan halyqtyń tileýi kóp uzamai oryndaldy.
"Sý tasqynynyń saldarynan tirnektep jinaǵan barlyq dúnie-múlkinen, malynan aiyrylǵan halyqtyń jaǵdaiy áli kúnge deiin kúrdeli ekendigine kózimiz jetti. Turǵyndardyń kópshiligi panalaityn oryn tappai qinalyp otyr eken. Sondyqtan, kóptiń tileýi - kiiz úi boldy. Biz, iaǵni "Saliqaly urpaq" qory jinalǵan halyqqa ýáde etip, birden tapsyrys berdik. Tapsyrysymyz ýaqytynda daiyn bolyp, minekei, búgin kiiz úilerdi aýyl ishine quryp, halyqqa tabystadyq, sózimizde turdyq. Bastysy, kiiz úilerdiń sapasyna mán berdik. Barlyǵy talapqa sai jasaldy. Jergilikti halyq rizashylyǵyn, sheksiz alǵystaryn bildirip jatyr. "Jumyla kótergen júk jeńil", - deidi ǵoi. Sondyqtan, qandai qiynshylyq bolsa da, halyqpen birge bolaiyq", - dedi "Saliqaly urpaq" qoǵamdyq qorynyń direktory Qasym Qasabekov.
Jalpy, qala aýmaǵyndaǵy sý basqan aýyldarda 87 úi, al tek Ekidiń aýylynyń ózinde 38 baspana turýǵa jaramsyz dep tanylǵan. Búginde jańa úilerdiń qurylysy bastalyp, halyqqa birte-birte ótemaqy tólenip, shyǵyn ótelip, kásipkerler tarapynan da tiisti kómek kórsetilip jatyr.
