"ساليقالى ۇرپاق" قورى سۋ تاسقىنىنان زارداپ شەككەن اۋىلدارعا كومەك رەتىندە كيىز ۇيلەر جىبەردى

Dalanews 23 مام. 2024 09:57 2490

"ساليقالى ۇرپاق" قورى سۋ تاسقىنىنان زارداپ شەككەن اۋىلدارعا كيىز ۇيلەر جىبەردى. حالىقتىڭ سۇرانىسىنا وراي ساتىپ الىنعان جىلۋ ارقالىق قالاسىنا قاراستى "ەكىدىڭ" جانە "قىزىل جۇلدىز" ەلدى مەكەندەرىنە جونەلتىلدى، حابارلايدى Dalanews.kz. 

قوستاناي وڭىرىندەگى بۇل اۋىلداردى سۋ باسىپ، ۇيلەر قيراپ، شاراسىز قالعان حالىق تۇگەل كوشىرىلگەن ەدى. سوندىقتان، "ساليقالى ۇرپاق" قوعامدىق قورىنىڭ مۇشەلەرى جەرگىلىكتى تۇرعىنداردىڭ جان-ايقايىن تىڭداپ، قانداي مۇقتاجدىق باسىم ەكەندىگىن ءبىلىپ، جاعدايدى كوزبەن كورۋ ءۇشىن وسى اۋىلدارعا ارنايى بارعان ەدى. ۋاقىتشا پانالايتىن كيىز ءۇي سۇراعان حالىقتىڭ تىلەۋى كوپ ۇزاماي ورىندالدى.

"سۋ تاسقىنىنىڭ سالدارىنان تىرنەكتەپ جيناعان بارلىق دۇنيە-مۇلكىنەن، مالىنان ايىرىلعان حالىقتىڭ جاعدايى ءالى كۇنگە دەيىن كۇردەلى ەكەندىگىنە كوزىمىز جەتتى. تۇرعىنداردىڭ كوپشىلىگى پانالايتىن ورىن تاپپاي قينالىپ وتىر ەكەن. سوندىقتان، كوپتىڭ تىلەۋى - كيىز ءۇي بولدى. ءبىز، ياعني "ساليقالى ۇرپاق" قورى جينالعان حالىققا ۋادە ەتىپ، بىردەن تاپسىرىس بەردىك. تاپسىرىسىمىز ۋاقىتىندا دايىن بولىپ، مىنەكەي، بۇگىن كيىز ۇيلەردى اۋىل ىشىنە قۇرىپ، حالىققا تابىستادىق، سوزىمىزدە تۇردىق. باستىسى، كيىز ۇيلەردىڭ ساپاسىنا ءمان بەردىك. بارلىعى تالاپقا ساي جاسالدى. جەرگىلىكتى حالىق ريزاشىلىعىن، شەكسىز العىستارىن ءبىلدىرىپ جاتىر. "جۇمىلا كوتەرگەن جۇك جەڭىل"، - دەيدى عوي. سوندىقتان، قانداي قيىنشىلىق بولسا دا، حالىقپەن بىرگە بولايىق"، - دەدى "ساليقالى ۇرپاق" قوعامدىق قورىنىڭ ديرەكتورى قاسىم قاسابەكوۆ.

ەسكە سالايىق، سۋ تاسقىنى كەزىندە ارقالىق قالاسىنا قاراستى "ەكىدىڭ" جانە "قىزىل جۇلدىز" اۋىلىنىڭ تۇرعىندارى تىكۇشاقتىڭ كومەگىمەن ءقاۋىپسىز ايماققا، ارقالىق قالاسىنداعى ەۆاكۋاسيالىق پۋنكتتەرگە كوشىرىلگەن ەدى.

جالپى، قالا اۋماعىنداعى سۋ باسقان اۋىلداردا 87 ءۇي، ال تەك ەكىدىڭ اۋىلىنىڭ وزىندە 38 باسپانا تۇرۋعا جارامسىز دەپ تانىلعان. بۇگىندە جاڭا ۇيلەردىڭ قۇرىلىسى باستالىپ، حالىققا بىرتە-بىرتە وتەماقى تولەنىپ، شىعىن وتەلىپ، كاسىپكەرلەر تاراپىنان دا ءتيىستى كومەك كورسەتىلىپ جاتىر.


ۇسىنىلعان
سوڭعى جاڭالىقتار