1 naýryzǵa deiin arnaiy salyq rejimin tańdamaǵan kásipkerler avtomatty túrde jalpyǵa birdei salyq salý tártibine ótedi, dep habarlaidy Dalanews.kz.
Memlekettik kirister komitetiniń málimetinshe, ońailatylǵan deklaratsiia negizindegi arnaiy salyq rejimin qoldanýdy josparlaǵan azamattar 2026 jylǵy 1 naýryzǵa deiin mindetti túrde habarlama tapsyrýy kerek. Eger bul talap oryndalmasa, salyq tóleýshi 1 qańtardan bastap jalpy rejimge aýystyrylǵan bolyp esepteledi.
Komitet ókilderi 2026 jyldan bastap elde jańa Salyq kodeksi kúshine engenin eske saldy. Qujatta úsh arnaiy rejim qarastyrylǵan:
– ózin-ózi jumyspen qamtyǵandar úshin;
– ońailatylǵan deklaratsiia negizinde;
– sharýa jáne fermer qojalyqtary úshin.
Tańdalǵan rejim týraly habarlamany salyq tóleýshiniń jeke kabinetinde, E-Salyq Business qosymshasynda, memlekettik kirister organdarynda qaǵaz túrinde nemese bankterdiń qosymshalary arqyly, onyń ishinde Kaspi Bank arqyly da jiberýge bolady.
Sonymen qatar, 1 naýryzdan bastap 2025 jyly patentpen nemese arnaiy mobildi qosymshamen jumys istegen jeke kásipkerler avtomatty túrde esepten shyǵarylady. Al ózin-ózi jumyspen qamtyǵandar rejimine kóshý E-Salyq Business qosymshasynda alǵashqy chek jasalǵan sátten bastap júzege asady.
Sharýa jáne fermer qojalyqtary úshin arnaiy rejimge kóshý avtomatty túrde júrgiziledi jáne qosymsha habarlama talap etilmeidi.
