2026 jyly Salyq kodeksine engiziletin ózgerister saldarynan shamamen 300 myń shaǵyn jáne orta biznes sýbektisi jabylýy múmkin. Bul boljamdy ekonomist Maqsat Halyq joqqa shyǵarmady, dep habarlaidy Dalanews.kz Todayinfo.kz-ke silteme jasap.
Alaida sarapshy bul kásiporyndardyń barlyǵy tolyq bankrotqa ushyraidy degendi bildirmeitinin atap ótti. Onyń aitýynsha, bir bóligi qyzmetin toqtatyp, keiin qaita tirkelýi nemese basqa formatta jumysyn jalǵastyrýy múmkin.
«Orta eseppen alǵanda, árbir shaǵyn jáne orta biznes sýbektisinde 2–3 adamnan jumys isteidi. Demek, bul ózgerister keminde jarty millionǵa jýyq azamattyń tabysyna áser etýi yqtimal. Árine, olardyń barlyǵy birden jumyssyz qalady deýge bolmaidy, biraq qysqa merzimde ýaqytsha jumyssyz qalý qaýpi joǵary», – deidi ekonomist.
Qazirgi resmi statistikaǵa sáikes, Qazaqstanda jumyssyzdyq deńgeii shamamen 5 paiyzdy quraidy. Alaida shaǵyn jáne orta biznestiń jappai jabylý úderisi bastalsa, bul kórsetkish taǵy 2–2,5 paiyzǵa ósýi múmkin.
«Resmi derek boiynsha 250–300 myń adam ýaqytsha jumyssyz qalýy yqtimal. Sebebi biznes tez jabylǵanymen, ondaǵy qyzmetkerlerdiń birden jańa jumys tabýy ońai emes», – dep túsindirdi Maqsat Halyq.
Ekonomist jumyssyzdyqtyń naqty deńgeii týraly derekterdiń ártúrli ekenin de atap ótti. Resmi statistikada bul kórsetkish 5 paiyzdan aspaidy. Alaida Memleket basshysy óz Joldaýynda Qazaqstanda jumyssyzdar sany 900 myńǵa jýyq ekenin aitqan, bul shamamen 9 paiyzǵa teń.
Al keibir halyqaralyq aýditorlyq jáne konsaltingtik kompaniialardyń esepterinde Qazaqstandaǵy naqty jumyssyzdyq deńgeii 15 paiyzǵa deiin jetýi múmkin ekeni kórsetilgen.
«Osy jaǵdaida qai derekke sený kerek degen zańdy suraq týyndaidy», – deidi sarapshy.
Eńbekpen qamtýǵa jaýapty ministrliktiń málimetinshe, elde jumyssyzdar sany 500 myńǵa jýyq, al 2 millionnan astam adam ózin-ózi jumyspen qamtyǵandar sanatyna kiredi. Alaida bul azamattardyń barlyǵy turaqty ári jetkilikti tabys taýyp otyr degen sóz emes.
«Buryn bir baǵdarlamanyń aiasynda men keminde 200 myń adamnyń “sátsiz ózin-ózi jumyspen qamtyǵandar” sanatyna jatatynyn aitqanmyn. Sondyqtan qazirgi ózinde naqty jumyssyzdyq deńgeii shamamen 7 paiyzdyń tóńireginde», – deidi Maqsat Halyq.
Ekonomistiń pikirinshe, eger shaǵyn jáne orta biznestiń bir bóligi jabylyp, qalǵandary salyqtyq qysymǵa bailanysty shtattaryn qysqartsa, bul kóptegen azamattardyń ýaqytsha tabysynan aiyrylýyna ákelýi múmkin.
«Búginde shaǵyn jáne orta bizneste shamamen 4 million adam jumys isteidi. Sondyqtan bul protsester halyq tabysynyń tómendeýine jáne áleýmettik shielenistiń kúsheiýine alyp kelý qaýpin arttyrady», – dep qorytyndylady sarapshy.
