Parlament ekinshi oqylymda «Qazaqstan Respýblikasynyń Konstitýtsiiasyna sáikestendirý, sailaý jáne prokýratýra týraly zańnamany jetildirý máseleleri boiynsha keibir konstitýtsiialyq zańdarǵa ózgerister men tolyqtyrýlar engizý týraly» Konstitýtsiialyq zańdy qabyldady, dep habarlaidy dalanews.kz.
Májilis málimetinshe, qujat ótken sailaý naýqandary kezinde anyqtalǵan máselelerdi eskere otyryp ázirlengen.
Jańa túzetýlerge sáikes ákimshilik aýmaqtyq birlikter ózgergen jaǵdaida sailaý komissiialarynyń ókilettikterin saqtaý jáne berý tártibi retteledi. Sonymen qatar aýmaqtyq sailaý komissiialary músheleriniń bala kútimi demalysy nemese oqý demalysy kezeńinde ókilettigin ýaqytsha toqtatyp, olardyń ornyna ýaqytsha ókil taǵaiyndaý tetigi engiziledi.
Sondai aq ákim laýazymyna kandidattar teń daýys jinaǵan jaǵdaida qaita daýys berý tártibi bekitilgen.
Qujatta kandidattardy usyný tártibine de ózgerister engizildi.
Endi bir adam bir mezette máslihat depýtaty jáne ákimdikke kandidat retinde túse almaidy. Budan bólek bir kandidat birneshe sailaý okrýginen qatar ákimdikke úmitker bola almaidy.
Sailaýaldy úgit jumystaryna qatysty da jańa talaptar paida boldy.
Kandidattarǵa óz internet resýrstarynda jáne onlain platformalardaǵy paraqshalarynda úgit materialdaryn jariialaýǵa ruqsat beriledi. Alaida kandidattar men saiasi partiialarǵa sailaý qorynan tys qarjylandyrý tartýǵa tyiym salynady.
Ortalyq jáne aýmaqtyq sailaý komissiialarynyń quzyreti de keńeitildi.
Eger daýys berý, daýystardy sanaý nemese qorytyndy shyǵarý kezinde zań talaptary buzylsa, jekelegen ýchaskelerde nemese ákimshilik aýmaqtarda sailaý nátijelerin jaramsyz dep taný múmkindigi engizildi.
Sonymen qatar úzdiksiz óndiris oryndarynda jáne vahtalyq ádispen jumys isteitin uiymdarda azamattardyń daýys berý quqyǵyn qamtamasyz etý úshin sailaý ýchaskelerin ashýǵa múmkindik beriledi.
Taǵy bir mańyzdy ózgeris – daýys berý kúni toltyrylǵan biýlletendi fotoǵa nemese videoǵa túsirýge jáne ony taratýǵa tyiym engizildi.
Májilis bul áreket sailaýaldy úgitke teńestiriletinin atap ótti.
Ne ózgerdi?
Buǵan deiin bir adamnyń bir ýaqytta birneshe baǵyt boiynsha sailaýǵa túsýine naqty shekteýler bolmaǵan. Sondai aq biýlletendi túsirýge qatysty naqty norma kórsetilmegen edi.
Jańa zań qabyldanǵannan keiin kandidattardy usyný tártibi qatańdatylyp, sailaý komissiialarynyń ókilettikteri naqtylandy. Budan bólek onlain úgit júrgizý, sailaý qorlaryn paidalaný jáne nátijelerdi jaramsyz dep taný rásimderi de naqty retteldi.
Zań jobasynda Quryltai jumysyna, proportsionaldy júiege kóshýge, Prezident pen Quryltai arasyndaǵy ókilettikterdi bólýge jáne respýblikalyq referendým ótkizý tártibine qatysty normalar da qamtylǵan.
