QR Ǵylym jáne joǵary bilim ministri Saiasat Nurbek memlekettik bilim granttarynyń nátijesi jariialanǵannan keiin talapkerler men olardyń ata-analaryna úndeý jasap, grant ielene almaǵan túlekterge qoldaý bildirdi, dep habarlaidy dalanews.kz.
Ministrdiń aitýynsha, biyl memlekettik bilim grantyn 75 myńnan astam talapker jeńip alǵan. Sonymen qatar konkýrs ótken jylmen salystyrǵanda aitarlyqtai joǵary bolǵan. Eger 2025 jyly grant konkýrsyna 113 myń ótinish tússe, biyl olardyń sany 127 myńǵa jetken.
Saiasat Nurbek grant ala almaǵan talapkerlerge memlekettik grant joǵary bilim alýdyń jalǵyz múmkindigi emes ekenin atap ótti. Onyń sózinshe, biyl joǵary oqý oryndary 2 myńnan astam rektorlyq grant bólip otyr. Sondai-aq ákimdikterdiń, iri kompaniialar men qoǵamdyq qorlardyń bilim granttary bar.
Ministr «Qazaqstan halqyna» qoǵamdyq qory aýyldyq jerlerden shyqqan túlekterge 350 grant usynatynyn, al KAZENERGY, «Qazatomónerkásip» jáne basqa uiymdar da óz bilim berý baǵdarlamalaryn júzege asyryp jatqanyn eske saldy.
Sondai-aq ol aqyly bólimge túsken stýdentterdiń keiin bosaityn memlekettik granttarǵa úmitker bola alatynyn aitty.
«Bir ǵana tizimge armanyńyzdyń aýqymyn anyqtaýǵa jol bermeńiz. Keide armanǵa aparar jol biz josparlaǵannan sál uzaǵyraq bolady. Biraq bul onyń basqa baǵytqa apara jatqanyn bildirmeidi», – dedi ministr.
Saiasat Nurbek ata-analardy balalaryna qoldaý kórsetýge shaqyryp, grant nátijesin ómirlik úkim retinde qabyldamaýǵa keńes berdi. Onyń aitýynsha, búgin memlekettik grant iegerleri qatarynan óz esimin taba almaǵan talapkerler úshin de joǵary bilim alýdyń basqa múmkindikteri saqtalyp otyr.
