30 naýryz kúni Qyzylqoǵa aýdany, Saǵyz aýyly ishimen ótetin Noǵaıty ózeniniń arnasynan shyǵyp, tasýy saldarynan  aýyldaǵy jıyrmadan astam úıdi sý basý qaýipi týyndaǵan edi, – dep habarlaıdy Dalanews.kz Atyraý oblysy ákiminiń baspasóz qyzmetine silteme jasap.

Qaýipsizdik úshin atalǵan úıdiń turǵyndary ýaqytsha evakýasıalanǵan bolatyn. Sý tasý qaýipi seılgendikten olardyń barlyǵy úılerine oraldy.

Jergilikti ákimdiktiń tıisti jumystardy jedel atqarýynyń arqasynda sý basý qaýipiniń aldy alyndy. Eshqandaı úı men qora sýǵa ketken joq.

Aldyn ala da qaýipsizdik jumystary júrgizilgen bolatyn.

Qaýipsizdik jumystaryna 20-ǵa jýyq tehnıka, ákimdik qyzmetkerleri, aýyl turǵyndary, ózge de mekeme ókilderi men eriktiler barlyǵy 200-den asa adam jumyldyryldy. Olar sý basýy múmkin degen jerlerge arnaıy qum salynǵan qaptar men topyraqtardy toltyryp bógetter turǵyzdy.

Turǵyndardyń aıtýynsha, Noǵaıty ózeniniń mundaı tasýy buryn-sońdy bolmaǵan. Bıyl aqpan aıynan bastap osymen úshinshi ret tasýda.

Qazir Noǵaıty ózeniniń arnasy tómendep, tasý qaýipi seıildi.

Qazir Saǵyz aýylynda aýdan ákimi Nursultan Bısembıev bastaǵan arnaıy shtab jumys isteýde.

Saǵyz aýylyndaǵy ahýal turaqty baqylaýda.