«SAFARI SHARDARA» festivali ótti
Shardara aýdany «Aqqala» demalys aimaǵynyń jaǵalaýynda alǵash ret «SAFARI SHARDARA» atty festival ótti. Aitýly sharada óńirdiń týristik áleýetin arttyrýǵa baǵyttalǵan kórme uiymdastyryldy.
Festival balyq aýlaýshylar jarysymen bastaldy. Keiin halyqaralyq deńgeidegi saiystarǵa ulasyp, bir sátte birneshe sport túrlerinen jarys ótti. Atap aitqanda, qazaqsha kúres, jelkendi qaiyq, akademiialyq esý, jaǵajai voleiboly men fýtboly, qol kúresi, gir kóterý, arqan tartý, bórenge órmeleý, qoshqar kóterý syndy jarystardan saiypqyrandar baq synady. Sondai-aq, qonaqtar Shardara aýdanynyń tarihymen, aýyl sharýashylyǵy ónimderi jáne ulttyq qolóner kórmesimen tanysty.
Odan soń shara sahnalyq kórinispen jalǵasyp, festivaldiń bastalýynan habar beretin daýylpazdar dabyl qaqty. Shardara aýdanynyń ónerpazdary arnaiy merekelik «Safari Shardara» ánin oryndady. Keiin Túrkistan-Otyrar-Shardara baǵytynda júrip ótken motobaikerler sahna alańynda MOTOKROSS ónerin kórsetip, jiylǵan qaýymdy tamsandyrdy.
Festival sý aidynyndaǵy qaiyqtardyń shoýymen jalǵasty. Onda saiysqa qatysqan 15 balyqshy qaiyqpen jaǵalaýǵa kelip, elimizdiń Týyn jelbiretti. Balyqshylardyń sońynan baidarka esýshiler óner kórsetti. Keiin «Qazyna», «Shamsinýr» bi toptary jáne tsirk ónerpazdary horeografiialyq kompozitsiia oryndady.
Túrkistan oblysy ákiminiń baspasóz qyzmeti
