Ridder qalasyna jumys sapary barysynda Shyǵys Qazaqstan oblysynyń ákimi birinshi kezekte «Botanika» jańa shaǵyn aýdanyna baryp, iri orman órtinen zardap shekken úilerdiń qurylys barysyn tekserdi. Búginde 32 baspananyń qurylysy aiaqtalýǵa jaqyn.
Qazirgi ýaqytta birneshe úide árleý jumystary jalǵasýda, sonymen qatar joldardy abattandyrý jáne asfalttaý jumystary júrgizilýde, jaqynda sý men elektr energiiasy qosylady.
Jospar boiynsha alǵashqy turǵyndar jańa turǵyn úilerge 18 shildede, qalǵandary – 15 tamyzǵa deiin kirýi tiis. Barlyq turǵyn úi tolyǵymen daiyn túrde tapsyrylady, tipti árqaisysynda as úi jihazy ornatylady. Órtke deiin shaǵyn ǵana baspanasy bolǵan turǵyndar da 80 sharshy metrlik keń úige qol jetkizedi.
Qala turǵyndarymen kezdesý barysynda óńir basshysy órtten keltirilgen zalaldy esepteý jónindegi komissiianyń jumysy aiaqtalǵanyn jáne 7 shildeden bastap adamdar ótemaqy tólemderin ala bastaitynyn habarlady.
– Búginde Ridder qalasynda turǵyn úi alý kezeginde 45 kóp balaly otbasy tur, olardyń 20-sy osy jyldyń ózinde-aq óz baspanalaryna ie bolady. Olar úshin jaily ári keń úiler «Botanika» shaǵyn aýdanynda salynýda, – dedi oblys ákimi.
Sapar sońynda D.Ahmetov Ridderdegi vaktsinatsiialaý barysymen tanysty. Qalada 10 statsionarlyq jáne bir jyljymaly ekpe salý pýnkti jumys isteidi. Olardyń barlyǵy mereke jáne demalys kúnderi de jumys isteýde, óitkeni qyzmetke degen suranys artqan.
– Shyǵys Qazaqstan oblysynda meditsina qyzmetkerleri men kúsh qurylymdarynyń 100%-y ekpe aldy. Respýblikanyń bas sanitarlyq dárigeriniń qaýlysyna sáikes qazir vaktsinatsiia stýdentter men muǵalimder, sondai-aq qyzmet kórsetý salasynda jumys isteitin azamattar arasynda belsendi júrgizilýde, – dedi aimaq basshysy jergilikti BAQ ókilderine.
