«Rýzanyń haty». Ziialylar nege únsiz?
«Mektepterde endi 2 pán ǵana qazaqsha – Qazaqstan tarihy jáne qazaq tili, qalǵan barsha jaratylystaný pánderi aǵylshynsha ótpek, orys tili jáne dúnie júzi tarihy oryssha ótpek. Bul – ultqa degen qarýsyz, ashtyqsyz, t.b. fizikalyq túrmen emes, biraq naqtyly rýhani genotsid dep baǵalaýǵa bolatyn shara» delingen «Ashyq hatta».
Shynymen de, hattyń mazmuny da, maǵynasy da ózekti. Osynyń ózinen-aq Bilim ministrligi jáne osy vedomstvonyń sý jańa basshysy – qazaq tili ǵylym men tehnika tili bola almaidy degendi ańǵartyp otyrǵan joq pa?
Endeshe Elbasynyń óz Joldaýynda «qazaq tili ǵylym men bilim, internettiń tiline ainaldy» degeni qaida? Prezident sonymen qatar 2025 jylǵa qarai qazaq tili ómirdiń barlyq salasynda ústemdik etip, kúndelikti qatynas tiline ainalatynyn aitqan. Bálkim Saǵadiev myrza Elbasynyń Joldaýymen tanyspaǵan bolar. Kim biledi...
Hatty uiymdastyrýǵa bastamashy bolǵan qoǵamdyq belsendi Rýza Beisenbaiteginiń aitýynsha, «Ashyq hatqa» qol qoiǵan adamdardyń sany qazirshe 1000-ǵa jetipti. Bizdińshe munyń ózi az.
Budan buryn endigi jerde bul hatqa salmaq kerek. Endeshe Bilim ministrliginiń ne «búldirip» jatqanyn estip, bilip otyrǵan ziialylar qaýymy nege únsiz? Qalamger Dýlat Isabekov, akter Asanáli Áshimov siiaqty elge tanymal tulǵalar «Ashyq hatqa» qol qoisa, onyń mańyzy da, salmaǵy da artar edi.
Rýza Beisenbai-teginiń aitýynsha, ázirge aty málim ziialylardyń kópshiligi atalǵan Ashyq hatqa qol qoimapty. Bir-ekeýine hatty joldap da kóripti, alaida jaýap kelmegen...
Dál qazir bul hatqa ziialy qaýymnyń qoldaý tanytýy asa mańyzdy. Biz ziialylardan týrashyldyq pen shynaiylyqty kútemiz, jaltaqtaýdyń zamany ótti.
Stalin zamanyndaǵy «Beseýdiń haty», Konstitýtsiiadan orys tilin alyp tastaý týraly Muhtar Shahanov bastaǵan «138-diń haty» qandai mańyzdy bolsa, bul «Ashyq hat» ta sondai mańyzdy ári ózekti.
