«مەكتەپتەردە ەندى 2 ءپان عانا قازاقشا – قازاقستان تاريحى جانە قازاق ءتىلى، قالعان بارشا جاراتىلىستانۋ پاندەرى اعىلشىنشا وتپەك، ورىس ءتىلى جانە دۇنيە ءجۇزى تاريحى ورىسشا وتپەك. بۇل – ۇلتقا دەگەن قارۋسىز، اشتىقسىز، ت.ب. فيزيكالىق تۇرمەن ەمەس، ءبىراق ناقتىلى رۋحاني گەنوسيد دەپ باعالاۋعا بولاتىن شارا» دەلىنگەن «اشىق حاتتا».
شىنىمەن دە، حاتتىڭ مازمۇنى دا، ماعىناسى دا وزەكتى. وسىنىڭ وزىنەن-اق ءبىلىم مينيسترلىگى جانە وسى ۆەدومستۆونىڭ سۋ جاڭا باسشىسى – قازاق ءتىلى عىلىم مەن تەحنيكا ءتىلى بولا المايدى دەگەندى اڭعارتىپ وتىرعان جوق پا؟
ەندەشە ەلباسىنىڭ ءوز جولداۋىندا «قازاق ءتىلى عىلىم مەن ءبىلىم، ينتەرنەتتىڭ تىلىنە اينالدى» دەگەنى قايدا؟ پرەزيدەنت سونىمەن قاتار 2025 جىلعا قاراي قازاق ءتىلى ءومىردىڭ بارلىق سالاسىندا ۇستەمدىك ەتىپ، كۇندەلىكتى قاتىناس تىلىنە اينالاتىنىن ايتقان. بالكىم ساعادييەۆ مىرزا ەلباسىنىڭ جولداۋىمەن تانىسپاعان بولار. كىم بىلەدى...
حاتتى ۇيىمداستىرۋعا باستاماشى بولعان قوعامدىق بەلسەندى رۋزا بەيسەنبايتەگىنىڭ ايتۋىنشا، «اشىق حاتقا» قول قويعان ادامداردىڭ سانى قازىرشە 1000-عا جەتىپتى. بىزدىڭشە مۇنىڭ ءوزى از.
بۇدان بۇرىن ەندىگى جەردە بۇل حاتقا سالماق كەرەك. ەندەشە ءبىلىم مينيسترلىگىنىڭ نە «ءبۇلدىرىپ» جاتقانىن ەستىپ، ءبىلىپ وتىرعان زيالىلار قاۋىمى نەگە ءۇنسىز؟ قالامگەر دۋلات يسابەكوۆ، اكتەر ءاسانالى ءاشىموۆ سياقتى ەلگە تانىمال تۇلعالار «اشىق حاتقا» قول قويسا، ونىڭ ماڭىزى دا، سالماعى دا ارتار ەدى.
رۋزا بەيسەنباي-تەگىنىڭ ايتۋىنشا، ازىرگە اتى ءمالىم زيالىلاردىڭ كوپشىلىگى اتالعان اشىق حاتقا قول قويماپتى. بىر-ەكەۋىنە حاتتى جولداپ دا كورىپتى، الايدا جاۋاپ كەلمەگەن...
ءدال ءقازىر بۇل حاتقا زيالى قاۋىمنىڭ قولداۋ تانىتۋى اسا ماڭىزدى. ءبىز زيالىلاردان تۋراشىلدىق پەن شىنايىلىقتى كۇتەمىز، جالتاقتاۋدىڭ زامانى ءوتتى.
ستالين زامانىنداعى «بەسەۋدىڭ حاتى»، كونستيتۋسيادان ورىس ءتىلىن الىپ تاستاۋ تۋرالى مۇحتار شاحانوۆ باستاعان «138ء-دىڭ حاتى» قانداي ماڭىزدى بولسا، بۇل «اشىق حات» تا سونداي ماڭىزدى ءارى وزەكتى.
