Shymkent qalasy ákiminiń orynbasary Rýslan Berdenovke qastandyq jasady dep aiyptalǵan Ernar Jiembaidyń isi boiynsha erteń sot úkimi jariialanýy tiis. Daý týdyrǵan qylmystyq is boiynsha basty sot talqylaýy eki apta buryn bastalǵan bolatyn, dep habarlaidy Dalanews.kz.
Búgin sotta aiyptalýshy Ernar Jiembai sońǵy sózin aitty. Ol óz áreketterin «kisi óltirýge oqtalý» emes, «densaýlyqqa qasaqana aýyr ziian keltirý» babyna qaita saralaýdy surady. Sondai-aq shyn ókinip otyrǵanyn eskerip, bostandyǵynan aiyrmaityn jaza taǵaiyndaýdy ótindi.
"Men – otbasymnyń jalǵyz asyraýshysymyn. Eki kámeletke tolmaǵan ulym, naýqas ákem bar", – dedi ol óz sózinde.
Osydan keiin sýdia Abinýr Qarabaev keńesý bólmesine ketti.
"Úkim erteń saǵat 12:00-de jariialanady. Biraq bul naqty ýaqyt emes", – dedi sýdia.
Keshe sot jaryssózinde aiyptalýshy óziniń burynǵy kórsetýlerinde qalatynyn málimdedi.
Oǵan deiingi otyrysta memlekettik aiyptaýshy, prokýror Baýyrjan Qaramanov Ernar Jiembaiǵa qandai jaza merzimin suraitynyn jariialaǵan bolatyn.
