21 qarasha kúni Rýdnyi qalasynda kóshe ataýlaryn ózgertýge arnalǵan tarihi qoǵamdyq tyńdaý ótti. Dalanews.kz tilshisi daýǵa ainalǵan máselege sholý jasady.
Tyńdalymda Ivan Franko kóshesin - Áliia Moldaǵulova, al 50 let Oktiabria kóshesin - Dostyq dep ózgertý máselesi qaraldy. Jiyn kezinde Rýdnyi qalasyndaǵy kósheler ataýyn ózgertýge 14 depýtattyń 12-si daýys berdi. "NG" málimetinshe, depýtat Azamat Ysqaqov daýys bermegen, sebebi ol máslihat komissiiasynyń turaqty músheliginde emes. Osylaisha qaladaǵy kósheler ataýyn ózgertýdi 10 depýtat qoldap, tek bireýi - "Gorniak" mádeni oiyn-saýyq ortalyǵynyń direktory Valerii Girfanov qarsy shyqqan.
Qoǵamdyq tyńdaý kezindegi daýly oqiǵa
Rýdnyi qalasynyń belsendisi ári jergilikti avtomekteptiń direktory Ekaterina Korchagina tyńdaý kezindegi sózimen qyzý talqyǵa tústi. Ol óz sózinde Keńes memleketiniń «uly róli» týraly baiandama jasap, osylaisha kóshe ataýlarynyń qazaqshalanýyna kelispeitinin bildirdi.
Odan keiin ol óz-ózin ustai almaǵandai kórinip, birden «biz bul qalany sizderge syiladyq» degen siiaqty óktem áńgimelerge kóshti. Bir sátte oǵan reglamentten asyp bara jatqany eskertilip edi, Korchagina:
"Senderdiń reglamentterińe túkirgenim bar!", - dep aiǵailaǵan.
Bul sózden keiin abdyrap qalǵan qalalyq máslihattyń tóraǵasy Azamat Ysqaqov politsiia shaqyryp, oǵan qatysty aryz jazdy. Politsiia Korchaginany ǵimarattan kúshtep shyǵaryp jiberdi.
Artynsha Ekaterina Korchagina áleýmettik jelide qorlaýyn jalǵastyrǵan.
"Taǵy bir jait. Men: “Ataýyn ózgertkennen keiin ne, joldarymyz jóndele me, ómirimiz jaqsara ma, jańa jumys oryndary ashyla ma, biz ózimizdi teń ustai bastaimyz ba, al sizderdiń balalaryńyz ainalany bylǵaýdy qoia ma?” degen sózden keiin olar qalai ashýlanǵanyn kórseńizder. Siz “balalar dep neni meńzep otyrsyz?” dep surai bastady. Men burysh-buryshqa túkiretinderdi ǵana emes, terezeden qoqys laqtyratyn, ony podezge shyǵaryp tastaityndardy aittym. Balalardyń oiyn alańdaryn syndyratyndardy, oryn-oryndy túkirikterimen, qabyqtarymen, kir-qoqystarymen lastaityn barlyq shoshqalardy aittym", - deidi Korchagina.
Áleýmettik jeli qoldanýshylary belsendini osy sózinen keiin qamaýǵa alýdy talap etip, keibiri e-otinish portaly arqyly onyń ústinen aryz da jazǵan.
Jelidegi talqylaý
Bul másele áleýmettik jelide birneshe kúnnen beri qyzý talqylanyp jatyr. Qalada turǵan Arai esimdi turǵynnyń sózinshe, aimaqta qazaq tiline degen qurmet joq.
"Rýdnyida men de turdym, jumys istedim. Qazaq tilińe degen qurmet 0! Muny ákimshilik ishinen bastap qala turǵyndarynyń kópshiliginen baiqadym. Kósheleriniń 90 paiyzy oryssha atalynǵan, tipti Abaidyń atynda kóshe joq. Kóshe atyn aýystyraiyq dese qala turǵyndary qol jinap kóterilemiz dep shyǵady. 3 qana qazaq mektebi bar. Mádeni oshaqtarynda da kóbine qyzmet etetinder orys ultynyń azamattary. Qiyn jaǵdai. Ózgeretinine kúmánim bar… ".
Ernur Kenjebekov esimdi taǵy bir qazaqstandyqtyń sózinshe, kóshelerge qazaqy ataýlar berý - rýhani táýelsizdigimizdi aiqyndaityn úlken qadam ekenin atap ótti.
"Qazaq tiliniń mártebesin kóterý - eldigimizdiń eń mańyzdy tirekteriniń biri. Rýdnyi qalasynyń kóshelerine, tipti qala ataýynyń ózine qazaqy ataýlar berý - rýhani táýelsizdigimizdi aiqyndaityn úlken qadam bolar edi. Bul óńirdiń mádenietine, tarihyna janashyrlyq tanytyp, qazaq rýhaniiaty úshin aianbai eńbek etken Ózbekáli aǵamyzdyń amanatyna da sai keledi. Tilimizdi qurmetteý, jerimizdiń ataýyn túgendeý - urpaq aldyndaǵy jaýapkershilik. Qazaq tilin kúndelikti ómirde keńinen qoldanýǵa jazsyn!".
Sonymen qatar, qazaqstandyqtar Rýdnyi qalasyndaǵy kóshelerdi ǵana emes, qala ataýyn da qazaqylandyrý keregin de jarysa jazyp jatyr. Biri jańa ataý retinde Keńqalany usynsa, endi biri Sarybai dep ataýdy usynǵan.
Aita keteiik, depýtattardyń tyńdalymdaǵy sheshimi túpkilikti sheshim emes. Endi qoǵamdyq tyńdaý materialdaryn respýblikalyq onomastikalyq komissiia maquldaýy qajet.
