Jazýshy-dramatýrg, QR eńbek sińirgen qaitkeri Roza Muqanova Býrabaidaǵy Ulttyq quryltaida kóterilgen máselelerge qatysty pikir bildirdi. Ol Ulttyq quryltai, bir jaǵynan esep berýshi, taǵy bir jaǵynan bolashaqtaǵy el damýy josparyn belgileýshi ári halyqtyń daýysyn estitin alań ispetti ekenin aitady, dep habarlaidy Dalanews.kz.
"Ulttyq quryltaida Memleket basshysynyń qarjyger-ekonomisterge qarata aitqan sózderi durys boldy dep oilaimyn. "Qandai sharalardyń qolǵa alyp jatqandyǵyn, qandai reformalardyń atqarylyp jatqandyǵyn halyqqa túsinikti tilde jetkizýlerińiz kerek", - dedi. Muny aldyndaǵy biznes ókilderimen kezdesýi kezinde de bank qyzmetkerlerine, qarjygerlerge de eskertken edi. Memlekettiń aldynda qoiylyp otyrǵan úlken isterdiń qalai atqarylyp jatqandyǵy jóninde halyq osyndai quryltai sekildi ashyq alańdardan bilip, qulaǵdar bolyp otyrady. Rasynda da elde jasalyp jatqan reformalar halyqqa túsinikti tilde jetkizilýi kerek. Halyq bárinen habardar bolyp otyrýy tiis", - deidi Roza Muqanova.
Sonymen qatar jazýshy biyl Abaidyń 180 jyldyǵyna bailanysty shetelderde Abai ortalyǵynyń, Abai mádeni ortalyqtarynyń ashylýy jóninde Ulttyq quryltaida Prezidenttiń aitqany kóńilge óte qonymdy bolǵanyn aitady.
"Bul bizdiń kópten kútip júrgen, oida áldilegen armanymyz edi. Óitkeni ol - ult mádenieti, ult rýhaniiaty máselesi. Rýhani ortalyqtyń salynýy basqa memleketterde júrgen otandastarymyz, elden jyraqta júrgen jastarymyz úshin de asa kerek dúnie. Bul úlken mádeni bailanysymyzdan, tarihymyzdan oqshaýlanyp qalmaýdyń bir joly dep oilaimyn. Buǵan Memleket basshysy Otandastar qorynyń Mádeniet jáne aqparat ministrligimen birlese otyryp, osy ortalyqtardy ashýǵa at salysýyn, sondai-aq Syrtqy ister ministrliginiń aralasýyna múmkindik beretinin aitty. Bul qazaq rýhaniiaty úshin ózekti ári boljamdy dúnie dep oilaimyn", - deidi jazýshy.
Sondai-aq ol Ulttyq quryltaida Memleket basshysynyń ulttyq biregeilikti nyǵaitý jaiyna basymdyq berip, teatr óneriniń kórsetkishteri artyp kele jatqanyna da toqtalǵanyn atap ótti.
"Bul qýanarlyq jaǵdai. Atalǵan salada, árine atqarylatyn ister kóp. Degenmen sońǵy bes jylda alys aimaqtardaǵy, alys ólkelerdegi halyqtyq teatrlarǵa jan bite bastady. Qazir alys aýdandarda oblys tetarlaryna arnaiy at aryltyp kele almaityn halyq bar. Sondyqtan shalǵai aimaqtardaǵy halyqtyq teatrlardy jandandyrý, shynymen de durys baǵalanatyn dúnie. Buǵan bizdiń akterlarymyz, óner adamdarymyz muryndyq bolyp otyr. Árine, teatr repertýarynyń jańarýy, zaman talabyna sai bolýy kerek. Óitkeni jańa tolqyn, jańa urpaq, jańa kórermen kelip jatyr. Sondyqtan biik deńgeidegi ónerdiń talǵamymen álemdik deńgeige qarai teatrdyń baǵyt-baǵdaryn ózgertý kerek ekenin de túsinip jatyrmyz. Jalpy, Memleket basshysy mádenietke kóńil bólip otyr. Ulttyq quryltaida kinoteatrlardaǵy jaǵdaiǵa da basa nazar aýdaryldy. Kinolardyń mán-maǵynasyna, siýjetine asa kóńil bólý keregin basa aitty. Sebebi, bul rette tek qarjy tabýǵa qunyǵyp, arzanqol, jeńil-jelpi dúnieler nasihatyna áýestenýge jol bermeý qajet. Búgingi jas urpaq qandai filmder kórip jatyr? Biz buzaqylyq, zorlyq-zombylyq nasihatynan kórermenderdi saqtandyra bilýimiz kerek. Mundai filmderdi, kerek deseńiz, memleket tarapynan súzgiden ótkizip, jasóspirimderdi, balalardy qorǵaý qajet", - deidi ol.
Jazýshy sóz sońynda Ulttyq quryltaida kóptiń kókeiindegi, eldi tolǵandyryp otyrǵan dúnielerdiń barlyǵy aitylyp, ashyq alańda ádiletti túrde halyqqa túsinikti tilde ortaǵa salynǵanyn, munyń ózine unaǵanyn aitady.
"Osyndaida kóptiń daýysyn ashyq estýge bolady. Eshqandai búrkelemeý degen joq. Halyq óziniń estigisi keletin dúniesin ziialy qaýym arqyly, depýtattar arqyly ortaǵa salýda. Kóptegen másele osy quryltaida sheshimin taýyp jatqanynyń kýási boldyq. Meniń oiymsha, bul jańa formatta atqarylyp otyrǵan is", - dep sózin qorytady dramatýrg-jazýshy Roza Muqanova.
