Almaty oblysy ákimi Qanat Bozymbaev Panfılov aýdanynyń ortalyǵy Jarkent qalasyndaǵy 2013 jyly salynǵan oblys ákimi rezıdensıasyn balalardy reabılıtasıalaý ortalyǵyna ótkizip beretinin aıtty, – dep habarlaıdy Dalanews.kz.

– Sóz reti kelip turǵanda aıta keteıin, osy Jarkent qalasynda oblys ákiminiń rezıdensıasy tur. 2013 jyly salynǵan. Ǵımarat kólemi 910 (toǵyz júz on) sharshy metr. Jer kólemi – bir gektar.

Maǵan sol rezıdensıanyń esh qajettiligi joq. Aýdanǵa kelsem, Jarkentte qonatyn jap-jaqsy qonaq úıler bar. Tamaqty dámdi daıyndaıtyn dámhana, kafe kóp. Sondyqtan, rezıdensıany balalardy reabılıtasıalaý ortalyǵyna ótkizip beremin.

Bul rezıdensıany reabılıtasıalaý ortalyǵyna aınaldyrý erekshe balalardy baǵyp-qaǵyp otyrǵan ata-anaǵa, ómir súrý úshin ár sátte kúreske túsken erekshe balalarǵa asa qajet dep oılaımyn, – dedi Almaty oblysynyń ákimi Qanat Bozymbaev.