FlyArystan áýe kompaniiasynyń Astana – Óskemen baǵytyndaǵy reisine otyrǵyzý kezinde jolaýshylardyń biri bortserikke shabýyl jasady. Bul týraly jýrnalist Azamat Erǵali áleýmettik jelidegi paraqshasynda jazdy, dep habarlaidy Dalanews.kz.
Onyń aitýynsha, shamamen 50 jastaǵy er adam ushaqqa otyrǵyzý kezinde agressivti áreket tanytqan.
“13 qańtar kúni Fly Arystan-nyń 7371 reisinde esersoq jolaýshy bortserikke shabýyl jasap, oǵan qol kóterdi. Buzaqy meniń oryndyǵymnyń artynda otyrdy. Bir kezde oryndyqqa qatty soqqy tigenin sezdim. Sodan keiin bortserik qyz ben er adamnyń aiǵaiyn estidim. Qoryqqanymnan ornymnan atyp turdym. Men ony toqtatpaq bolyp, “Ne istep jatyrsyń?!” dep aiqai salǵanda ol maǵan da birneshe ret qolymen soqqy jasady”, — deidi ol.
Sózinshe, er adam keiin de tártipsizdigin jalǵastyryp, basqa jolaýshylarǵa, onyń ishinde oqiǵa kýágerine de tiise bastaǵan.
Atalǵan oqiǵadan soń politsiia barlyq jolaýshyny borttan túsirip, reisti keiinge qaldyrýǵa májbúr bolǵan. Ázirge áýe kompaniiasy bul jaǵdaiǵa qatysty resmi túsinikteme bergen joq.
Politsiianyń málimetinshe, 47 jastaǵy er adam ustalǵan. Kólik departamenti onyń áreketi qoǵamdyq qaýipsizdikke qaýip tóndirgenin atap ótti.
“Kúdikti mas kúiinde bortseriktiń ishinen uryp, ushaqtan shyǵyp bara jatyp “bomba” dep aiqailaǵan. Bul jolaýshylar men ekipaj arasynda dúrbeleń týdyrdy”, – delingen kólik basqarmasynyń habarlamasynda.
Osy oqiǵaǵa bailanysty buzaqylyq jáne terrorizm aktisi týraly jalǵan aqparat berý baptary boiynsha qylmystyq is qozǵaldy. Ushaq muqiiat tekserilip, jarylǵysh qurylǵylar nemese basqa da tyiym salynǵan zattar tabylmady.
Eske salaiyq, bir jyl buryn FlyArystan ushaǵynda osyǵan uqsas oqiǵa tirkelgen bolatyn. Tanymal ártis Baýyrjan Nurymbetov mas kúiinde qoǵamdyq tártipti buzyp, stiýardessaǵa qol jumsaǵan. Saldarynan ártiske 15 AEK mólsherinde aiyppul salynǵan edi.
