FlyArystan اۋە كومپانياسىنىڭ استانا – وسكەمەن باعىتىنداعى رەيسىنە وتىرعىزۋ كەزىندە جولاۋشىلاردىڭ ءبىرى بورتسەرىككە شابۋىل جاسادى. بۇل تۋرالى جۋرناليست ازامات ەرعالي الەۋمەتتىك جەلىدەگى پاراقشاسىندا جازدى، دەپ حابارلايدى Dalanews.kz.
ونىڭ ايتۋىنشا، شامامەن 50 جاستاعى ەر ادام ۇشاققا وتىرعىزۋ كەزىندە اگرەسسيۆتى ارەكەت تانىتقان.
“13 قاڭتار كۇنى Fly Arystan-نىڭ 7371 رەيسىندە ەسەرسوق جولاۋشى بورتسەرىككە شابۋىل جاساپ، وعان قول كوتەردى. بۇزاقى مەنىڭ ورىندىعىمنىڭ ارتىندا وتىردى. ءبىر كەزدە ورىندىققا قاتتى سوققى تيگەنىن سەزدىم. سودان كەيىن بورتسەرىك قىز بەن ەر ادامنىڭ ايعايىن ەستىدىم. قورىققانىمنان ورنىمنان اتىپ تۇردىم. مەن ونى توقتاتپاق بولىپ، “نە ىستەپ جاتىرسىڭ؟!” دەپ ايقاي سالعاندا ول ماعان دا بىرنەشە رەت قولىمەن سوققى جاسادى”، — دەيدى ول.
سوزىنشە، ەر ادام كەيىن دە تارتىپسىزدىگىن جالعاستىرىپ، باسقا جولاۋشىلارعا، ونىڭ ىشىندە وقيعا كۋاگەرىنە دە تيىسە باستاعان.
اتالعان وقيعادان سوڭ پوليسيا بارلىق جولاۋشىنى بورتتان ءتۇسىرىپ، رەيستى كەيىنگە قالدىرۋعا ءماجبۇر بولعان. ازىرگە اۋە كومپانياسى بۇل جاعدايعا قاتىستى رەسمي تۇسىنىكتەمە بەرگەن جوق.
پوليسيانىڭ مالىمەتىنشە، 47 جاستاعى ەر ادام ۇستالعان. كولىك دەپارتامەنتى ونىڭ ارەكەتى قوعامدىق قاۋىپسىزدىككە ءقاۋىپ توندىرگەنىن اتاپ ءوتتى.
“كۇدىكتى ماس كۇيىندە بورتسەرىكتىڭ ىشىنەن ۇرىپ، ۇشاقتان شىعىپ بارا جاتىپ “بومبا” دەپ ايقايلاعان. بۇل جولاۋشىلار مەن ەكيپاج اراسىندا دۇربەلەڭ تۋدىردى”، – دەلىنگەن كولىك باسقارماسىنىڭ حابارلاماسىندا.
وسى وقيعاعا بايلانىستى بۇزاقىلىق جانە تەرروريزم اكتىسى تۋرالى جالعان اقپارات بەرۋ باپتارى بويىنشا قىلمىستىق ءىس قوزعالدى. ۇشاق مۇقيات تەكسەرىلىپ، جارىلعىش قۇرىلعىلار نەمەسە باسقا دا تىيىم سالىنعان زاتتار تابىلمادى.
ەسكە سالايىق، ءبىر جىل بۇرىن FlyArystan ۇشاعىندا وسىعان ۇقساس وقيعا تىركەلگەن بولاتىن. تانىمال ءارتىس باۋىرجان نۇرىمبەتوۆ ماس كۇيىندە قوعامدىق ءتارتىپتى بۇزىپ، ستيۋاردەسساعا قول جۇمساعان. سالدارىنان ارتىسكە 15 اەك مولشەرىندە ايىپپۇل سالىنعان ەدى.
