Exit poll-dyń nátijesi jariialanǵannan keiin Respýblikalyq qoǵamdyq shtab músheleriniń aldynda sóilegen sózinde Qasym-Jomart Toqaev búgin erekshe, tarihi naýqan ótkenin atap ótti.
– Bul naýqannyń bizdiń tarihymyzda qalatyny sózsiz. Exit Poll-dyń aldyn ala nátijesi shyqty. Árine, resmi qorytyndyny kútemiz. Degenmen qazirdiń ózinde halqymyz maǵan Prezident retinde jáne barshańyzǵa úlken senim artty dep aitýǵa bolady. Halyqtyń senimi – bul eń qundy nárse. Sondyqtan halyqtyń senimin bárimiz aqtaýymyz kerek. Búgin, mine 21 qarashadan bastap bárimiz jumysqa kirisýimiz qajet, – dedi Qasym-Jomart Toqaev.
Sonymen qatar myqty memleket quramyz desek, eń aldymen, ádildik ornatý qajet ekenin, onsyz eshqandai da reforma bolmaitynyn aitty. Onyń aitýynsha, bárimiz bir ult, bir qoǵam bolyp iske kirisýimiz qajet.
Qasym-Jomart Toqaev ózine úlken senim artqany úshin koalitsiiaǵa rizashylyǵyn bildirdi.
– Qoǵamdyq shtabqa, senimdi ókilderime, eriktilerge raqmet aitamyn. Sizder elimizdiń ár túkpirine bardyńyzdar. Aýyl-aimaqtar, shalǵai eldi mekender nazardan tys qalǵan joq. El arasynda úgit-nasihat júrgizdińizder. Bul – úlken jumys. Ony men eshqashan umytpaimyn. Sol sebepti búgingi kórsetkish – bárimizge ortaq jeńis, – dedi Qasym-Jomart Toqaev.
Onyń pikirinshe, sailaý zańǵa sáikes ótti. Qazaqstan Respýblikasynyń Prezidenttigine úmitkerlerge birdei múmkindik berildi.
– Olar aimaqtardy emin-erkin aralady. Sailaýshylarmen kezdesip, úgit-nasihat júrgizdi. Iaǵni, eshkimge shekteý qoiylǵan joq. Árbir sailaýshyǵa óz tańdaýyn jasaýyna erkindik berildi. Sondyqtan bul naýqan erekshe ádil, ashyq ótti, – dedi Qasym-Jomart Toqaev.
Qasym-Jomart Toqaev Prezident sailaýy jańa saiasi dáýirge jol ashatynyn aityp, aldaǵy ýaqytta basty bilik institýttary túgel jańǵyrtylatynyn jetkizdi.
– Konstitýtsiialyq reformany tolyǵymen jáne naqty júzege asyramyz. Elimizdiń saiasi qurylysyn jańa qalypqa túsiremiz. Ekonomikany túbegeili ózgertemiz. Halqymyzdyń ál-aýqatyn arttyramyz. Sonyń bárin oidaǵydai atqarý úshin bizge birlik kerek. Sondyqtan árdaiym birge bolaiyq! – dedi Qasym-Jomart Toqaev.
Sóziniń sońynda ol sharaǵa qatysýshylardy Jańa, Ádiletti Qazaqstandy birge qurýǵa shaqyryp, baq-bereke tiledi.
