Jetisai aýdanynyń jurtshylyǵy da Respýblika kúnin joǵary dárejede atap ótti. Saltanatty mereke aiasynda Qaraqai aýyldyq okrýgine qarasty Sátpaev eldi mekenindegi mádeniet jáne sport kesheni paidalanýǵa berildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
1986 jyly qoldanysqa berilgeli jóndeý kórmegen Mádeniet úiiniń kúrdeli jóndeý jumystary ótken jyldyń mamyr aiynda bastalyp, 2679,1 sharshy metr aýmaqqa júrgizilgen jóndeý jumystarynyń jalpy quny 691 mln. 445 myń teńgeni quraǵan.
Óndiristik kestege máikes kelesi jyly qoldanysqa berilýi tiis bolǵan mádeniet úiin «Namys» JShS merdiger mekemesi biyl aiaqtap, el igiligine tapsyryp otyr. Jańartylǵan keshende mádeniet úiiniń qyzmetkerlerimen qatar aýyldyq kitaphana, sporttyń voleibol, fýtbol jáne shahmat, toǵyzqumalaq, boks pen qazaq, erkin kúres, án, kúi, bi úiirmeleri jumys isteitin bolady.
Aýdan ákimi mádeniet úiin aralap, jumysymen tanysyp, úiirmelerdiń qatysýshylarymen tildesti.
Qolóner buiymdary men kitap, sýret kórmesi jurtshylyq nazaryna usynylǵan merekelik sharaǵa aýdan ákimi Serik Mamytov pen aýdandyq máslihat tóraǵasy Medet Qasymov, «AMANAT» partiiasy Jetisai aýdandyq filialynyń atqarýshy hatshysy, eńbek ardagerleri men jergilikti turǵyndar, quqyq qorǵaý organdarynyń ókilderi men jergilikti máslihat depýtattary, BAQ pen ziialy qaýym ókilderi, san salanyń úzdikteri qatysty.
Atalǵan is-sharada aýdan ákimi Serik Mamytov aýdan turǵyndary men qonaqtaryn Respýblika kúnimen quttyqtady. Sonymen qatar áleýmettik-ekonomikalyq damýyna súbeli úles qosyp júrgen birqatar jandar marapattaldy.
Memlekettik tarihymyzdyń mereili merekesi bolǵan Respýblika kúni merekesiniń saltanatty bóliminen soń aýdan ónerpazdarynyń merekelik kontserttik baǵdarlamasy kópshilikke kóterińki kóńil-kúi syilady. Ánnen shashý shashylyp, kúmbirlegen kúi Jetisai aspanyn ulttyq qundylyqtarmen kómkerdi.
