Reseilik filosof ári saiasi ideolog Aleksandr Dýgin postkeńestik keńistiktegi táýelsiz memleketter kezeńi aiaqtalǵanyn málimdep, birqatar eldi Máskeýdiń yqpal aimaǵyna qaita qosýdy usyndy, dep habarlaidy Dalanews.kz.
Tikelei efir barysynda ol qazirgi jahandyq ózgerister aiasynda Resei álemdegi basty geosaiasi kúsh ortalyqtarynyń birine ainalýy tiis ekenin aitty. Onyń pikirinshe, strategiialyq mańyzy bar aimaqtar Kreml baqylaýynda bolýǵa mindetti, óitkeni Resei yqpalynan tys qalǵan memleketter erte me, kesh pe ózge derjavalardyń múddesine qyzmet etetin quralǵa ainalady.
Dýginniń aitýynsha, beitarap aýmaq degen uǵym is júzinde joq.
«Úshpoliýsti álem jaǵdaiynda bizdiń basty mindetimiz - eń yqpaldy kúsh ortalyǵy bolý. Resei shyn máninde egemen, keń aýqymdy jáne derbes memleketke ainalýy kerek. Al biz baqylamai otyrǵan keńistikter eshqashan óz betimen beitarap bolyp qala almaidy», - dedi ol.
Ol sondai-aq jeke memleket retinde ómir súrýine jol berilmeýi tiis elderdiń tizimin de atady. Dýgin bul qatarǵa Qazaqstandy, Ózbekstandy, Qyrǵyzstandy, Tájikstandy, Armeniiany, Grýziiany jáne Ázerbaijandy engizdi.
«Egemen Armeniia, egemen Grýziia, egemen Ázerbaijan, egemen Qazaqstan, sondai-aq Ózbekstan, Tájikstan men Qyrǵyzstannyń táýelsiz memleket retinde saqtalýyna kelisýge bolmaidy», - dep málimdedi ol.
Ideolog usynǵan tujyrymdamada ulttyq egemendik uǵymyna oryn joq. Onyń paiymynsha, atalǵan elder Reseidiń jetekshiligindegi birtutas saiasi odaqtyń quramyna enýi tiis. Al mundai jol tańdalmaǵan jaǵdaida, olar Batys elderi, Eýropalyq odaq, AQSh nemese Qytai syndy ózge geosaiasi ortalyqtardyń yqpal alańyna ótedi.
