رەسەيلىك فيلوسوف ءارى ساياسي يدەولوگ الەكساندر دۋگين پوستكەڭەستىك كەڭىستىكتەگى تاۋەلسىز مەملەكەتتەر كەزەڭى اياقتالعانىن مالىمدەپ، ءبىرقاتار ەلدى ماسكەۋدىڭ ىقپال ايماعىنا قايتا قوسۋدى ۇسىندى، دەپ حابارلايدى Dalanews.kz.
تىكەلەي ەفير بارىسىندا ول قازىرگى جاھاندىق وزگەرىستەر اياسىندا رەسەي الەمدەگى باستى گەوساياسي كۇش ورتالىقتارىنىڭ بىرىنە اينالۋى ءتيىس ەكەنىن ايتتى. ونىڭ پىكىرىنشە، ستراتەگيالىق ماڭىزى بار ايماقتار كرەمل باقىلاۋىندا بولۋعا مىندەتتى، ويتكەنى رەسەي ىقپالىنان تىس قالعان مەملەكەتتەر ەرتە مە، كەش پە وزگە دەرجاۆالاردىڭ مۇددەسىنە قىزمەت ەتەتىن قۇرالعا اينالادى.
دۋگيننىڭ ايتۋىنشا، بەيتاراپ اۋماق دەگەن ۇعىم ءىس جۇزىندە جوق.
«ءۇشپوليۋستى الەم جاعدايىندا ءبىزدىڭ باستى مىندەتىمىز - ەڭ ىقپالدى كۇش ورتالىعى بولۋ. رەسەي شىن مانىندە ەگەمەن، كەڭ اۋقىمدى جانە دەربەس مەملەكەتكە اينالۋى كەرەك. ال ءبىز باقىلاماي وتىرعان كەڭىستىكتەر ەشقاشان ءوز بەتىمەن بەيتاراپ بولىپ قالا المايدى»، - دەدى ول.
ول سونداي-اق جەكە مەملەكەت رەتىندە ءومىر سۇرۋىنە جول بەرىلمەۋى ءتيىس ەلدەردىڭ ءتىزىمىن دە اتادى. دۋگين بۇل قاتارعا قازاقستاندى، وزبەكستاندى، قىرعىزستاندى، تاجىكستاندى، ارمەنيانى، گرۋزيانى جانە ازەربايجاندى ەنگىزدى.
«ەگەمەن ارمەنيا، ەگەمەن گرۋزيا، ەگەمەن ازەربايجان، ەگەمەن قازاقستان، سونداي-اق وزبەكستان، تاجىكستان مەن قىرعىزستاننىڭ تاۋەلسىز مەملەكەت رەتىندە ساقتالۋىنا كەلىسۋگە بولمايدى»، - دەپ مالىمدەدى ول.
يدەولوگ ۇسىنعان تۇجىرىمدامادا ۇلتتىق ەگەمەندىك ۇعىمىنا ورىن جوق. ونىڭ پايىمىنشا، اتالعان ەلدەر رەسەيدىڭ جەتەكشىلىگىندەگى ءبىرتۇتاس ساياسي وداقتىڭ قۇرامىنا ەنۋى ءتيىس. ال مۇنداي جول تاڭدالماعان جاعدايدا، ولار باتىس ەلدەرى، ەۋروپالىق وداق، اقش نەمەسە جۇڭگو سىندى وزگە گەوساياسي ورتالىقتاردىڭ ىقپال الاڭىنا وتەدى.
