Reseilik Lynx atty hakerlik top Ulybritaniiadaǵy segiz áskeri bazanyń ishki qujattary men qyzmetkerleriniń jeke derekterin, sondai-aq kiberqaýipsizdik nusqaýlyqtaryn internetke jariialap jiberdi. Bul týraly Daily Mail gazeti jazdy, dep habarlaidy Dalanews.kz.
Ulybritaniianyń Qorǵanys ministrligi bul jaǵdaiǵa bailanysty tergeý bastalǵanyn málimdedi.
Basylym dereginshe, shabýyl Qorǵanys ministrliginiń merdiger kompaniiasy – áskeri nysandardy salýmen jáne tehnikalyq qyzmet kórsetýmen ainalysatyn Dodd Group uiymyna baǵyttalǵan. Sondai-aq urlanǵan materialdardyń arasynda taǵy bir qurylys kompaniiasy – Kier firmasyna tiesili qujattar da bar.
Hakerler qupiia qujattar úshin aqsha bopsalap, aqparatty birtindep jariialai bastaǵan.
Áshkere bolǵan málimetter
Internetke taraǵan qujattardyń arasynda Koroldik áskeri-áýe kúshteriniń (RAF) bazalarynyń syzbalary bar. Sol nysandarda iadrolyq qarýlar men amerikalyq F-35 joiǵyshtary saqtalatyny, sondai-aq jabyq rejimdegi radar stantsiialary men áskeri drondardyń negizgi ortalyǵy ornalasqany aitylady.
Sonymen qatar, Ulybritaniianyń ońtústigindegi áskeri-teńiz bazalary týraly málimetter de ashyq derekkózderge tarap ketken.
Ulybritaniia biligi bul derekterdiń taralýy eldiń ulttyq qaýipsizdigine qaýip tóndirýi múmkin ekenin aityp, jaǵdaidy baqylaýǵa alǵan.
