رەسەيلىك Lynx اتتى حاكەرلىك توپ ۇلىبريتانياداعى سەگىز اسكەري بازانىڭ ىشكى قۇجاتتارى مەن قىزمەتكەرلەرىنىڭ جەكە دەرەكتەرىن، سونداي-اق كيبەرقاۋىپسىزدىك نۇسقاۋلىقتارىن ينتەرنەتكە جاريالاپ جىبەردى. بۇل تۋرالى Daily Mail گازەتى جازدى، دەپ حابارلايدى Dalanews.kz.

ۇلىبريتانيانىڭ قورعانىس مينيسترلىگى بۇل جاعدايعا بايلانىستى تەرگەۋ باستالعانىن مالىمدەدى.

باسىلىم دەرەگىنشە، شابۋىل قورعانىس مينيسترلىگىنىڭ مەردىگەر كومپانياسى – اسكەري نىسانداردى سالۋمەن جانە تەحنيكالىق قىزمەت كورسەتۋمەن اينالىساتىن Dodd Group ۇيىمىنا باعىتتالعان. سونداي-اق ۇرلانعان ماتەريالداردىڭ اراسىندا تاعى ءبىر قۇرىلىس كومپانياسى – Kier فيرماسىنا تيەسىلى قۇجاتتار دا بار.

حاكەرلەر قۇپيا قۇجاتتار ءۇشىن اقشا بوپسالاپ، اقپاراتتى بىرتىندەپ جاريالاي باستاعان.

اشكەرە بولعان مالىمەتتەر

ينتەرنەتكە تاراعان قۇجاتتاردىڭ اراسىندا كورولدىك اسكەري-اۋە كۇشتەرىنىڭ (RAF) بازالارىنىڭ سىزبالارى بار. سول نىسانداردا يادرولىق قارۋلار مەن امەريكالىق F-35 جويعىشتارى ساقتالاتىنى، سونداي-اق جابىق رەجيمدەگى رادار ستانسيالارى مەن اسكەري درونداردىڭ نەگىزگى ورتالىعى ورنالاسقانى ايتىلادى.

سونىمەن قاتار، ۇلىبريتانيانىڭ وڭتۇستىگىندەگى اسكەري-تەڭىز بازالارى تۋرالى مالىمەتتەر دە اشىق دەرەككوزدەرگە تاراپ كەتكەن.

ۇلىبريتانيا بيلىگى بۇل دەرەكتەردىڭ تارالۋى ەلدىڭ ۇلتتىق قاۋىپسىزدىگىنە ءقاۋىپ ءتوندىرۋى مۇمكىن ەكەنىن ايتىپ، جاعدايدى باقىلاۋعا العان.