AQSh Reseidiń munai kompaniialaryna qarsy sanktsiia engizdi. Saldarynan munai baǵasy qymbattady, dep habarlaidy Dalanews.kz.
AQSh Reseidiń eń iri munai kompaniialaryna qarsy jańa sanktsiialar engizip, Máskeýdi Ýkrainadaǵy soǵysty toqtatýǵa niet tanytpady dep aiyptady. Bul sheshim Reseidiń iadrolyq qarýdy paidalaný jónindegi iri áskeri oqý-jattyǵýlarynan keiin qabyldandy.
Sanktsiialar jáne olardyń maqsaty
AQSh Qarjy ministrligi «Rosneft» pen «Lýkoil» kompaniialary jańa shekteýler tizimine engenin málimdedi. Maqsat – Máskeýdiń áskeri is-qimyldaryn qarjylandyrý qabiletin álsiretý.
Sonymen qatar, Eýropalyq odaq ta Reseige qarsy 19-paket sanktsiiany bekitti. Bul sharalardyń ishinde reseilik suiytylǵan tabiǵi gazdy importtaýǵa tyiym salý da bar ekenin EO tóraǵalyq etýshi el Daniia habarlady.
Vashington saiasatynyń baǵyty ózgerdi
Reuters málimetinshe, bul sheshim Aq úi saiasatynyń aiqyn ózgerisin kórsetti. Buǵan deiin AQSh Máskeýge qysym jasaý men beibit kelisimge kelý arasyndaǵy tepe-teńdikti saqtaýǵa tyrysyp kelgen.
Ótken aptada Donald Tramp Máskeýge qarsy jańa sharalardan nátije kútpei, olardy keiinge qaldyrǵanyn aitqan edi.
«Qazir qantógisti toqtatyp, atysty dereý doǵaratyn ýaqyty keldi», – dedi AQSh Qarjy ministri Skott Bessent.
Ministrdiń bul málimdemesinen keiin munai baǵasy barreline 2 dollardan astamǵa ósti.
Tramptyń ustanymy
Birneshe ai boiy Tramp AQSh Kongresiniń energetikalyq sanktsiia engizý jónindegi qysymyna qarsy bolǵan. Ol Pýtin soǵysty toqtatady dep úmittengen edi.
Sonymen qatar, Tramp Ýkrainaǵa uzaq qashyqtyqtaǵy “Tomagavk” zymyrandaryn berýge daiyn emes ekenin aitty. NATO Bas hatshysy Mark Riýttemen kezdesýde ol ýkrainalyqtarǵa bul qarýdy meńgerý úshin kem degende alty ai qajet bolatynyn atap ótti.
Feik aqparatqa jaýap
Tramp The Wall Street Journal-dyń «AQSh Ýkrainaǵa uzaq qashyqtyqtaǵy zymyrandardy paidalanýǵa ruqsat berdi» degen aqparatyn jalǵan dep atady.
«Olar bizdiń zymyrandarymyzdy qoldanbaidy. Meniń oiymsha, olar eýropalyq zymyrandardy paidalanyp jatyr. Bul men baqylaityn nárse emes, biraq bizdiń qarýlardy qoldanýǵa ruqsat joq. Bul – jalǵan aqparat», – dedi Tramp.
Si Tszinpinge úndeý
Kelesi aptada Ońtústik Koreiada ótetin kezdesýde Tramp Qytai tóraǵasy Si Tszinpinge Pýtinge yqpal etip, soǵysty toqtatýǵa kómektesý jóninde ótinish bildirmek.
Si Tszinpin men Pýtin sońǵy jyldary eki el arasyndaǵy strategiialyq aliansty nyǵaityp keledi.
Eske salaiyq, buǵan deiin AQSh prezidenti Donald Tramp Resei prezidenti Vladimir Pýtinmen Býdapeshtte ótedi dep josparlanǵan kezdesýdi ótkizbeitinin málimdegenin habarlaǵan edik.
