Óz kezeginde til janashyry, Májilis depýtaty Qazybek Isa Erlan Qiiasovqa bylaisha renishin jetkizdi.
– Úsh depýtat qazaqsha suraq qoidy, siz oryssha jaýap berip jatyrsyz. Jalpy jiyn boiy 15-20 shaqty adam sóz aldy, sonda eki-aq adam qazaqsha sóiledi. Olar – Maqsat Berdiqulov (Veterinariia boiynsha ulttyq referenttik ortalyq direktory) pen Qýanysh Asylhanuly (Bilim jáne ǵylym vitse-ministri). Elordada júrgende qazaqsha sóileitin adam kórseń, shetelde qazaq kórgendei qýanasyń. Osy eki baýyrym úshin qýanyp otyrmyn. Biraq Erlan Ańsaǵanuly (Qiiasov) úshin qýaryp otyrmyn, – dedi Qazybek Isa.
Depýtat Qiiasovtan óz suraǵyna jaýap ala almai júrgenin de eske saldy.
– Qaýipti aqparat taratpaý jóninde sizge suraq jibergenmin. Áli jaýap almadym. Endi sizder kele jatqanda qai eldiń parlamentine bara jatyrmyn dep oilamaisyzdar ma? Reseidiń dýmasyna kele jatqandai jaibaraqat bolasyzdar. Siz «Nur Otannyń» múshesisiz ǵoi, iá? Endeshe «Nur Otannyń» tóraǵasy Nursultan Nazarbaev Parlament pen Úkimet tek memlekettik tilde sóileýi kerek ekenin aitqan. Osy jerdegi 15-20 adam túgeldei derlik sol partiianyń múshesi. Bári Resei tilinde sóilep otyr. «Nur Otannyń» tapsyrmasyn «Aq jol» ókili, men ǵana oryndaýym kerek pe? – dedi Qazybek Isa.
Aita keteiik, májiliste «Qazaqstan Respýblikasynyń biologiialyq qaýipsizdigi týraly» dep atalatyn zań jobasyn talqylaýǵa dóńgelek ústel otyrysy boldy. Oǵan Májilis komitetiniń depýtattary, jumys tobynyń músheleri, Densaýlyq saqtaý vitse-ministri ári QR Bas memlekettik sanitariialyq dárigeri Erlan Qiiasov, QR Aýyl sharýashylyǵy vitse-ministri Rústem Qurmanov, QR Bilim jáne ǵylym vitse-ministri Qýanysh Erǵaliev qatysty.
Sondai-aq beinekonferentsbailanys quraldary arqyly biologiialyq, meditsinalyq tehnologiialar, biologiialyq qaýipsizdik, ekologiia, ǵylymi zertteýler salasyndaǵy qyzmetti júzege asyratyn ulttyq ortalyqtar men institýttardyń basshylary, múddeli ministrlikter men vedomstvolardyń ókilderi qatysqanyn aita ketýimiz kerek. Ǵylymi mekeme basshylarynyń baiandamalary men Densaýlyq saqtaý ministrligi ókiliniń jaýaptary orys tilinde bolǵany ras.
