ءوز كەزەگىندە ءتىل جاناشىرى، ءماجىلىس دەپۋتاتى قازىبەك يسا ەرلان قياسوۆقا بىلايشا رەنىشىن جەتكىزدى.
– ءۇش دەپۋتات قازاقشا سۇراق قويدى، ءسىز ورىسشا جاۋاپ بەرىپ جاتىرسىز. جالپى جيىن بويى 15-20 شاقتى ادام ءسوز الدى، سوندا ەكى-اق ادام قازاقشا سويلەدى. ولار – ماقسات بەردىقۇلوۆ (ۆەتەريناريا بويىنشا ۇلتتىق رەفەرەنتتىك ورتالىق ديرەكتورى) پەن قۋانىش اسىلحان ۇلى (ءبىلىم جانە عىلىم ۆيسە-مينيسترى). ەلوردادا جۇرگەندە قازاقشا سويلەيتىن ادام كورسەڭ، شەتەلدە قازاق كورگەندەي قۋاناسىڭ. وسى ەكى باۋىرىم ءۇشىن قۋانىپ وتىرمىن. ءبىراق ەرلان اڭساعان ۇلى (قياسوۆ) ءۇشىن قۋارىپ وتىرمىن، – دەدى قازىبەك يسا.
دەپۋتات قياسوۆتان ءوز سۇراعىنا جاۋاپ الا الماي جۇرگەنىن دە ەسكە سالدى.
– ءقاۋىپتى اقپارات تاراتپاۋ جونىندە سىزگە سۇراق جىبەرگەنمىن. ءالى جاۋاپ المادىم. ەندى سىزدەر كەلە جاتقاندا قاي ەلدىڭ پارلامەنتىنە بارا جاتىرمىن دەپ ويلامايسىزدار ما؟ رەسەيدىڭ دۋماسىنا كەلە جاتقانداي جايباراقات بولاسىزدار. ءسىز «نۇر وتاننىڭ» مۇشەسىسىز عوي، ءيا؟ ەندەشە «نۇر وتاننىڭ» ءتوراعاسى نۇرسۇلتان نازاربايەۆ پارلامەنت پەن ۇكىمەت تەك مەملەكەتتىك تىلدە سويلەۋى كەرەك ەكەنىن ايتقان. وسى جەردەگى 15-20 ادام تۇگەلدەي دەرلىك سول پارتيانىڭ مۇشەسى. ءبارى رەسەي تىلىندە سويلەپ وتىر. «نۇر وتاننىڭ» تاپسىرماسىن «اق جول» وكىلى، مەن عانا ورىنداۋىم كەرەك پە؟ – دەدى قازىبەك يسا.
ايتا كەتەيىك، ماجىلىستە «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» دەپ اتالاتىن زاڭ جوباسىن تالقىلاۋعا دوڭگەلەك ۇستەل وتىرىسى بولدى. وعان ءماجىلىس كوميتەتىنىڭ دەپۋتاتتارى، جۇمىس توبىنىڭ مۇشەلەرى، دەنساۋلىق ساقتاۋ ۆيسە-مينيسترى ءارى ق ر باس مەملەكەتتىك سانيتاريالىق دارىگەرى ەرلان قياسوۆ، ق ر اۋىل شارۋاشىلىعى ۆيسە-مينيسترى رۇستەم قۇرمانوۆ، ق ر ءبىلىم جانە عىلىم ۆيسە-مينيسترى قۋانىش ەرعالييەۆ قاتىستى.
سونداي-اق بەينەكونفەرەنسبايلانىس قۇرالدارى ارقىلى بيولوگيالىق، مەديسينالىق تەحنولوگيالار، بيولوگيالىق قاۋىپسىزدىك، ەكولوگيا، عىلىمي زەرتتەۋلەر سالاسىنداعى قىزمەتتى جۇزەگە اسىراتىن ۇلتتىق ورتالىقتار مەن ينستيتۋتتاردىڭ باسشىلارى، مۇددەلى مينيسترلىكتەر مەن ۆەدومستۆولاردىڭ وكىلدەرى قاتىسقانىن ايتا كەتۋىمىز كەرەك. عىلىمي مەكەمە باسشىلارىنىڭ باياندامالارى مەن دەنساۋلىق ساقتاۋ مينيسترلىگى وكىلىنىڭ جاۋاپتارى ورىس تىلىندە بولعانى راس.
