Eýropalyq odaq Reseıdiń bes portymen qandaı da bir tasymaldy júzege asyrýǵa tyıymdy da qarastyratyn 16-sanksıalar paketin jarıalady. Munaı salasynyń sarapshy Oljas Baıdildınov munyń Qazaqstanǵa yqtımal teris áserin atap, óz boljamymen bólisti, dep jazady Dalanews.kz LS basylymyna silteme jasap.
SDN paraǵynda Astrahan, Mahachkala, Ýst-Lýga, Prımorsk jáne Novorossıısk porttary kórsetilgen. EO málimetinshe, bul porttar arqyly sanksıany aınalyp ótip, shekteý engizilgen Reseı munaıy eksporttalady.
Oljas Baıdildınov túsindirip ótkendeı, kóleńkeli flottaǵy 74 tankermen shıkizat tasıtyn kompanıalarǵa birqatar taýarlardy, tehnologıalardy jáne baǵdarlamalyq jasaqtamalardyń da tasymalyna tyıym salyndy. Sarapshynyń aıtýynsha, bul logıstıkany qıyndatyp, sonyń ishinde Reseıden keletin energetıkalyq resýrstar ónimderiniń qymbattaýyna ákelip soǵýy múmkin.
"Iá, biz munaıymyzdy Novorossıısk arqyly da tasymaldaımyz. Bul jerde teńiz termınaly emes, odan sál ári qaraı ornalasqan porttyń ózi týraly sóz bolyp otyrýy múmkin. Mahachkala arqyly júkti almastyra tıeý qarastyrylǵan. Múmkin shıkizattyń bir bóligi Ýst-Lýga arqyly ótetin shyǵar. Biraq, negizinen, Qazaqstanǵa bul shekteýlerge áser etpeýi kerek", - dep túsindiredi ol.
Sarapshynyń pikirinshe, bul arada salynǵan sanksıalar saldarynan taýarlar men tasymal qyzmetteri qymbattaýy múmkin, sodan keıin saqtandyrý qaǵazyn alý da qıynǵa soǵýy yqtımal. Sondaı-aq, tankerlerge sanksıalar qoldanylǵan jaǵdaıda ónim tapshylyǵy da týyndaýy múmkin.
"Kóleńkeli flot – bul qandaı da bir kemege qatysty shekteý ǵana emes. Bul tasymalmen aınalysatyn komandaǵa qatysty jeke tyıymdar. Bóten bir elde, barlyq kartalaryńyz buǵattalyp, qalyp ketseńiz jaǵdaı, árıne, óte qıyn ǵoı. Álbette, bul sanksıalardyń barlyǵy tasymal men logıstıka jelisiniń buzylýyna ákelip soǵady. Onyń saldary Qazaqstandy sharpymaıdy dep jaqsydan úmittengennen basqa bizde amal joq. Qalaı bolǵanda da, resmı málimdemelerdi kúteıik ", - dep sózin qorytyndylaıdy Oljas Baıdildınov.
Sonymen qatar, Eýroodaqtyń sanksıalyq tizimine eki qazaqstandyq kompanıa – Kazstanex jáne Metallstan da engeni belgili boldy.
Buǵan deıin saıtymyzda "Eshqaı port qabyldamaıdy". Munaı tıegen reseılik tankerler teńiz betinde "tentirep" júr" degen maqala jarıalanǵan bolatyn.
