Londonnyń Ortalyq qylmystyq soty Resei barlaýyna jumys istedi dep aiyptalǵan birneshe bolgar azamatyna qatysty isti qaraýdy jalǵastyryp jatyr. Sot otyrystarynyń birinde tyńshylar tobynyń Qazaqstan Prezidentin bedelden aiyrý maqsatynda josparlaǵan áreketteri jaily málimetter belgili boldy, dep habarlaidy Dalanews.kz Orda.kz-ke siltep.
Qarashanyń sońynda ótken sot tyńdalymdarynda reseilik tyńshylardyń josparlaǵan alty «operatsiiasynyń» ekeýi Qazaqstanǵa qatysty ekeni aitylǵan. Biri – qazir Ulybritaniiada jasyrynyp júrgen Atyraý oblysynyń burynǵy ákimi Bergei Rysqalievke qastandyq jasaý jospary. Ekinshisi – Londondaǵy Qazaqstan elshiliginiń janynda jalǵan «narazylyq aktsiiasyn» uiymdastyrý. Biraq tyńshylardyń qazaqstandyq bilikti qaralaý josparlary munymen shektelmegen.
Resei agentteriniń tobyna bes adam kirgen. Olardyń ekeýi – Orlin Rýsev pen Biser Djambazov tyńshylyq jasaǵandaryn moiyndady. Al qalǵandary (Katrin Ivanova, Vania Gaberova jáne Tihomir Ivanchev) kinálaryn moiyndaǵan joq. Orlin Rýsevtiń aitýynsha, ol nusqaýlardy Avstriia azamaty Ian Marsalekten alǵan. Marsalek Resei barlaýyna tikelei jumys istegen. Qazir ol Interpoldyń izdeýinde, oǵan 1,6 milliard fýnt sterling (1 trillion teńgeden astam) kólemindegi alaiaqtyq boiynsha aiyp taǵylǵan.
Orlin Rýsev jáne onyń sybailastary kirgen toptyń josparlary týraly qosymsha málimetterdi britandyq BAQ – BBC men The Telegraph jariialady. Olardyń derekterine súiensek, reseilik tyńshylar Qazaqstan biligin qaralaý úshin aýqymdy aqparattyq naýqan uiymdastyrýdy kózdegen.
BBC-diń jazýynsha, Qazaqstanǵa baǵyttalǵan aqparattyq shabýyldyń nysany prezident Qasym-Jomart Toqaevtyń uly Timýr bolýy múmkin edi. Tyńshylar toby onyń bedeline nuqsan keltiretin jalǵan kompromat daiyndaýdy josparlaǵan, bul arqyly Astanaǵa qysym jasaýǵa tyrysqan.
«Top Qazaqstan prezidentiniń ulynyń qatysýymen dipfeik pornografiialyq video jasaý nemese ony «bal» tuzaǵyna» túsirý múmkindigin talqylady», – delingen aqparatta. "Bal" tuzaǵy – arnaiy qyzmetter jii qoldanatyn ádis. Bul ádis boiynsha barlaý nysanyna tartymdy adam jiberilip, onymen jaqyn qarym-qatynas ornatady. Nátijesinde qajetti aqparat alynyp, ol shantaj jasaý nemese kompromat jariialaý úshin paidalanylady.
The Telegraph-tiń málimetinshe, Toqaevtyń ulyn jalǵan uiatsyz kontent arqyly uiatqa qaldyrý josparlanǵan. Bul nusqaýlardy Kremldiń tikelei tapsyrysy retinde oryndaǵanyn Ian Marsalek málimdegen.
