لوندوننىڭ ورتالىق قىلمىستىق سوتى رەسەي بارلاۋىنا جۇمىس ىستەدى دەپ ايىپتالعان بىرنەشە بولگار ازاماتىنا قاتىستى ءىستى قاراۋدى جالعاستىرىپ جاتىر. سوت وتىرىستارىنىڭ بىرىندە تىڭشىلار توبىنىڭ قازاقستان پرەزيدەنتىن بەدەلدەن ايىرۋ ماقساتىندا جوسپارلاعان ارەكەتتەرى جايلى مالىمەتتەر بەلگىلى بولدى، دەپ حابارلايدى Dalanews.kz Orda.kz-كە سىلتەپ.
قاراشانىڭ سوڭىندا وتكەن سوت تىڭدالىمدارىندا رەسەيلىك تىڭشىلاردىڭ جوسپارلاعان التى «وپەراسياسىنىڭ» ەكەۋى قازاقستانعا قاتىستى ەكەنى ايتىلعان. ءبىرى – ءقازىر ۇلىبريتانيادا جاسىرىنىپ جۇرگەن اتىراۋ وبلىسىنىڭ بۇرىنعى اكىمى بەرگەي رىسقالييەۆكە قاستاندىق جاساۋ جوسپارى. ەكىنشىسى – لوندونداعى قازاقستان ەلشىلىگىنىڭ جانىندا جالعان «نارازىلىق اكسياسىن» ۇيىمداستىرۋ. ءبىراق تىڭشىلاردىڭ قازاقستاندىق بيلىكتى قارالاۋ جوسپارلارى مۇنىمەن شەكتەلمەگەن.
رەسەي اگەنتتەرىنىڭ توبىنا بەس ادام كىرگەن. ولاردىڭ ەكەۋى – ورلين رۋسيەۆ پەن بيسەر دجامبازوۆ تىڭشىلىق جاساعاندارىن مويىندادى. ال قالعاندارى (كاترين يۆانوۆا، ۆانيا گابەروۆا جانە تيحومير يۆانچيەۆ) كىنالارىن مويىنداعان جوق. ورلين رۋسيەۆتىڭ ايتۋىنشا، ول نۇسقاۋلاردى اۆستريا ازاماتى يان مارسالەكتەن العان. مارسالەك رەسەي بارلاۋىنا تىكەلەي جۇمىس ىستەگەن. ءقازىر ول ينتەرپولدىڭ ىزدەۋىندە، وعان 1،6 ميلليارد فۋنت ستەرلينگ (1 تريلليون تەڭگەدەن استام) كولەمىندەگى الاياقتىق بويىنشا ايىپ تاعىلعان.
ورلين رۋسيەۆ جانە ونىڭ سىبايلاستارى كىرگەن توپتىڭ جوسپارلارى تۋرالى قوسىمشا مالىمەتتەردى بريتاندىق ب ا ق – BBC مەن The Telegraph جاريالادى. ولاردىڭ دەرەكتەرىنە سۇيەنسەك، رەسەيلىك تىڭشىلار قازاقستان بيلىگىن قارالاۋ ءۇشىن اۋقىمدى اقپاراتتىق ناۋقان ۇيىمداستىرۋدى كوزدەگەن.
BBCء-دىڭ جازۋىنشا، قازاقستانعا باعىتتالعان اقپاراتتىق شابۋىلدىڭ نىسانى پرەزيدەنت قاسىم-جومارت توقايەۆتىڭ ۇلى تيمۋر بولۋى مۇمكىن ەدى. تىڭشىلار توبى ونىڭ بەدەلىنە نۇقسان كەلتىرەتىن جالعان كومپرومات دايىنداۋدى جوسپارلاعان، بۇل ارقىلى استاناعا قىسىم جاساۋعا تىرىسقان.
«توپ قازاقستان پرەزيدەنتىنىڭ ۇلىنىڭ قاتىسۋىمەن ديپفەيك پورنوگرافيالىق ۆيدەو جاساۋ نەمەسە ونى «بال» تۇزاعىنا» ءتۇسىرۋ مۇمكىندىگىن تالقىلادى»، – دەلىنگەن اقپاراتتا. "بال" تۇزاعى – ارنايى قىزمەتتەر ءجيى قولداناتىن ءادىس. بۇل ءادىس بويىنشا بارلاۋ نىسانىنا تارتىمدى ادام جىبەرىلىپ، ونىمەن جاقىن قارىم-قاتىناس ورناتادى. ناتيجەسىندە قاجەتتى اقپارات الىنىپ، ول شانتاج جاساۋ نەمەسە كومپرومات جاريالاۋ ءۇشىن پايدالانىلادى.
The Telegraphء-تىڭ مالىمەتىنشە، توقايەۆتىڭ ۇلىن جالعان ۇياتسىز كونتەنت ارقىلى ۇياتقا قالدىرۋ جوسپارلانعان. بۇل نۇسقاۋلاردى كرەملدىڭ تىكەلەي تاپسىرىسى رەتىندە ورىنداعانىن يان مارسالەك مالىمدەگەن.
