Kókshetaýlyq bloger Aslan Tólegenov 7 jylǵa deiin bas bostandyǵynan aiyrylýy múmkin. Ol tikelei efirdegi balaǵat sózi úshin ákimshilik jaza alyp, keiin ultaralyq arazdyq qozdyrdy degen aiyppen qylmystyq is qozǵaldy, dep habarlaidy Dalanews.kz.
Kókshetaý turǵyny, bloger Aslan Tólegenov TikTok-taǵy tikelei efir kezinde beiádep sóz aitqany úshin 10 táýlikke ákimshilik qamaýǵa alyndy. Ol áleýmettik jelide Qazaqstanda «orystarǵa qarsy kózqaras beleń alyp bara jatyr» dep jii málimdeme jasap júrgen.
Óziniń aitýynsha, Tólegenov qarsylasynyń syn-eskertpelerine jaýap retinde ǵana qatty sóilegenin alǵa tartyp, arandatýǵa ushyraǵanyn málimdegen.
Alaida ákimshilik jazamen shektelmei, oǵan endi Qylmystyq kodekstiń 174-baby — «Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý» boiynsha aiyp taǵyldy. Bul bap boiynsha 7 jylǵa deiin bas bostandyǵynan aiyrý jazasy qarastyrylǵan.
Qazir Aslan Tólegenovtiń qamaý merzimi eki aiǵa uzartylyp, ol tergeý izoliatoryna aýystyryldy. Blogerdiń isimen UQK ainalysyp jatyr.
Eske salaiyq, buǵan deiin Tólegenov álemjelide Aslan esimdi TikTok qoldanýshysy Keńes úkimetin maqtap, orys tilin qoldap, "orys tilin bilmeitinder adam emes" degen syńaidaǵy videolar túsirip júrgen edi. Tipti ol videolarynyń birinde daýly málimdemesimen synǵa qalǵan Tina Kandelakidi de ashyq qoldaitynyn jetkizdi.
Videolary milliondaǵan qaralym jinaityn er adamnyń oqyrmany da az emes. Onyń instagramdaǵy paraqshasyna 5,5 myń adam, TikTok-paraqshasyna 44,4 myń adam jazylǵan.
Ol videolarynyń birinde Qazaqstanda orys tili "rasynda, shettetilip jatqanyn" aityp, Tina Kandelakige qoldaý bildirgen. Bir qyzyǵy búginde 1,4 million qaralym jinaǵan bul videosyna ony qoldap, pikir jazǵandar da tabylǵan.
Taǵy bir videosynda er adam orys tili qazaqtar úshin mańyzdy orynda bolýy keregin aitady.
"Orys tili barlyq ilim men bilimniń kilti, ol arqyly kez kelgen esikti asha alasyń. Álemde milliondaǵan adamnyń bailanys ornatýynyń kilti", - deidi Aslan.
Videoda ol qazaqtar úshin orys tili sheksiz bailyq ekenin de jetkizgen.
