Sý resýrstary jáne irrigatsiia ministri Nurjan Nurjigitov Májiliste ótken Úkimet saǵatynda Jaiyq ózeniniń sýyn birlesip paidalaný boiynsha Reseimen aradaǵy kelisimderdiń barysyna toqtaldy, dep habarlaidy Dalanews.kz.
Ministrdiń aitýynsha, 2023 jyldan beri transshekaralyq ózenderge qatysty 80-nen astam kezdesý ótkizilse, sonyń 22-si reseilik tarappen júrgizilgen. Sý bólisý máseleleri alǵash ret 2016 jyly bekitilgen arnaiy kelisimshart aiasynda qarastyrylǵan. Bul qujat Ekologiia jáne tabiǵi resýrstar ministrligi men Reseidiń tiisti organdary arasynda jasalǵan.
"2019 jáne 2024 jyldary sol kelisimniń merzimin uzarttyq. Alaida 18 tarmaqtan turatyn qujat tek ekologiialyq máselelerdi ǵana qamtidy. Biyl, iaǵni 2024 jyldyń jeltoqsan aiynda bul kelisim taǵy bes jylǵa uzartyldy", — dedi Nurjigitov depýtattardyń saýalyna jaýap bere otyryp.
Ministr atap ótkendei, kei jyldary Resei Qazaqstanǵa tiesili sýdyń tek jartysyn ǵana bergen. Máselen, 2019 jyly Jaiyqtan keletin sý kólemi eń tómen deńgeide tirkelgen.
"Jalpy kelisim boiynsha jyl saiyn keminde 7,8 milliard tekshe metr sý alýymyz qajet. Alaida 2019 jyly nebári 3,5 milliard tekshe metr ǵana sý berildi. Osyǵan bailanysty memleket basshylary arnaiy tapsyrma berip, Jaiyq ózenin tiimdi basqarý maqsatynda jol kartasy ázirlendi", — dedi ministr.
Jol kartasy aiasynda Jaiyqtyń boiyndaǵy sý qoimalary men bógetterdi túgendep, tehnikalyq jaǵdaiyn tekserý jumystary júrgizilmek. Bul qujattyń da merzimi jaqynda uzartylǵan.
