سۋ رەسۋرستارى جەنە يرريگاتسييا مينيسترٸ نۇرجان نۇرجٸگٸتوۆ مەجٸلٸستە ٶتكەن ٷكٸمەت ساعاتىندا جايىق ٶزەنٸنٸڭ سۋىن بٸرلەسٸپ پايدالانۋ بويىنشا رەسەيمەن اراداعى كەلٸسٸمدەردٸڭ بارىسىنا توقتالدى, دەپ حابارلايدى Dalanews.kz.
مينيستردٸڭ ايتۋىنشا, 2023 جىلدان بەرٸ ترانسشەكارالىق ٶزەندەرگە قاتىستى 80-نەن استام كەزدەسۋ ٶتكٸزٸلسە, سونىڭ 22-سٸ رەسەيلٸك تاراپپەن جٷرگٸزٸلگەن. سۋ بٶلٸسۋ مەسەلەلەرٸ العاش رەت 2016 جىلى بەكٸتٸلگەن ارنايى كەلٸسٸمشارت اياسىندا قاراستىرىلعان. بۇل قۇجات ەكولوگييا جەنە تابيعي رەسۋرستار مينيسترلٸگٸ مەن رەسەيدٸڭ تيٸستٸ ورگاندارى اراسىندا جاسالعان.
"2019 جەنە 2024 جىلدارى سول كەلٸسٸمنٸڭ مەرزٸمٸن ۇزارتتىق. الايدا 18 تارماقتان تۇراتىن قۇجات تەك ەكولوگييالىق مەسەلەلەردٸ عانا قامتيدى. بيىل, ياعني 2024 جىلدىڭ جەلتوقسان ايىندا بۇل كەلٸسٸم تاعى بەس جىلعا ۇزارتىلدى", — دەدٸ نۇرجٸگٸتوۆ دەپۋتاتتاردىڭ ساۋالىنا جاۋاپ بەرە وتىرىپ.
مينيستر اتاپ ٶتكەندەي, كەي جىلدارى رەسەي قازاقستانعا تيەسٸلٸ سۋدىڭ تەك جارتىسىن عانا بەرگەن. مەسەلەن, 2019 جىلى جايىقتان كەلەتٸن سۋ كٶلەمٸ ەڭ تٶمەن دەڭگەيدە تٸركەلگەن.
"جالپى كەلٸسٸم بويىنشا جىل سايىن كەمٸندە 7,8 ميلليارد تەكشە مەتر سۋ الۋىمىز قاجەت. الايدا 2019 جىلى نەبەرٸ 3,5 ميلليارد تەكشە مەتر عانا سۋ بەرٸلدٸ. وسىعان بايلانىستى مەملەكەت باسشىلارى ارنايى تاپسىرما بەرٸپ, جايىق ٶزەنٸن تيٸمدٸ باسقارۋ ماقساتىندا جول كارتاسى ەزٸرلەندٸ", — دەدٸ مينيستر.
جول كارتاسى اياسىندا جايىقتىڭ بويىنداعى سۋ قويمالارى مەن بٶگەتتەردٸ تٷگەندەپ, تەحنيكالىق جاعدايىن تەكسەرۋ جۇمىستارى جٷرگٸزٸلمەك. بۇل قۇجاتتىڭ دا مەرزٸمٸ جاقىندا ۇزارتىلعان.
