Resei delegatsiiasy Ýkrainamen kelissóz júrgizýge 15 mamyrda Ystambulǵa barady, dep habarlaidy Dalanews.kz.
Bul týraly Resei prezidentiniń baspasóz hatshysy Dmitrii Peskov málimdedi. Degenmen delegatsiia quramy ázirge jariialanbady. Bul týraly reseilik basylymdar jazyp jatyr.
Ýkraina prezidenti Vladimir Zelenskii buǵan deiin Túrkiia prezidenti Rejep Taiyp Erdoǵanmen Ankarada kezdesý týraly kelisim jasaǵanyn aitqan edi. Eger Vladimir Pýtin Túrkiia astanasyna barýdan bas tartyp, Ystambuldy tańdasa, onda Zelenskii men Erdoǵan da sol jaqqa barýǵa daiyn ekenin málimdedi.
"Biz Pýtinmen kezdesý úshin barlyǵyn jasaimyz. Atysty toqtatý týraly sheshimdi ol ǵana qabyldai alady", – dedi Ýkraina basshysy.
BAQ málimetinshe, Resei men Ýkraina arasyndaǵy kelissózderge AQSh memlekettik hatshysy Marko Rýbio da qatysady. Bul týraly Donald Tramp Saýd Arabiiasyndaǵy investitsiialyq forýmda aitty. AQSh prezidenti kelissózderden "óte jaqsy nátijeler" kútetinin de jetkizgen edi.
